|
|
¶ Op die wise Hoe lustelic is ons dye coele mey ghedaen
HOe minnelic is ons des crucen boom ontdaen het spruten gheel bloemkens aender heyden. so wie met druc met liden is beuaen in ihesus wonden sal hi hem vermeyden.
¶ Die mey die is al biden wech geset. op eenen berch en die staet also hoghe om dat een yegelic soude sonder let ten soeten crucen mey aenscouwen mogen
¶ Nv staen des meyen tacken wtgespreyt ende bloeyen schoon gelijc die rode rosen so wie zijn sonden zijn gebreken hier bescreit onder desen boom sal hi hem verposen
¶ Recht op gewassen is den edelen greyn ende is geplant in also diepen dale dats in mariam die suuer maget reyn. van minnen so sterf die fiere nachtigale
¶ Die fiere nachtegale des crucen boom op clam hi heeft sijn vederkens so wide ontploken. hi sanc so luyde die .vij. noten hooch so dat sijn edel hertken is gebroken
¶ Nv is de fiere nachtigael bleuen doot om minnen van eender suuerder ioncfrouwen hi quam so hoge al wt sijns vaders schoot wie hoorde ye gelike deser trouwen
¶ So wie zijn sinnen noch ongestadich zijn. ende cleuen noch op aertsche creatueren die mercke aen desen nachtigale fijn. hoe hi den doot om onsen wil woude besuren | |
|
Coelde van Munster, Dierick (co-auteur),
Dit is een suverlijc boecxken in welcke staen scone leysen ende veel scone gheestelike liedekens. Noch een liedeken van devocien ghemaect bi broeder Dirck van munster
|
1508
|
Den Haag KB: 228 G 35 (in facsimile) |
fd5r |
|
Dirk Geirnaert, naar bron, diplomatisch. |
|