|
|
¶ Dit liedeken gaet op die wijse van Cleue hoorne en batenborch
MEt vruechdnn [vruechden] willen wi singen ende louen die triniteyt dat si ons wil bringhen ter eewigher salicheyt die eewelick sal dueren eewelic ende sonder verganck och mocht ons dat ghebueren och eewelick is so lanck.
¶ Leefden wi na die gheboden also wi leuen souden ende dienen altoos gode ende onser lieuer vrouwen ende lieten ouer liden die werelt in haren ganck so souden wi hier na verbliden och eewelic is so lanck
¶ Die blischap is sonder eynde hier bouen in hemelrijc. die wi daer sullen vinden. en heeft gheen ghelijck dat es dat godlijc wesen. het schenct ons goeden dranc also wi horen lesen och eewelick.
¶ Die enghelen van hier bouen si maken so grote chier laet ons hem allen louen het ghelt ons eeuen dier so moghen wi verbliden ende singhen der enghelen sanc tot eeweliken tiden och eewelic is so lanc
¶ Die heilighen allegader si maken grote feest si louen god den vader den soon den heylighen gheest als wi die sonden laten si wetent ons groten danck si verbliden bouen maten och eewelic is so lanck
¶ Maria moeder ons heeren si is van ons verblijt wanneer wi ons bekeeren. in deser ellendigher tijt maria maghet reyne o edel wijngaert ranck bidt voer ons al ghemeyne och eewelic is so lanck
¶ Nv laet ons dienen gode. dat rade ick ionck ende out ende houden sijn ghebode ende dienen hem menichfout dat hi ons wil beschermen van alder hellen stanck ende van dat eewighe kermen. och eewelic is so lanck | |
|
Coelde van Munster, Dierick (co-auteur),
Dit is een suverlijc boecxken in welcke staen scone leysen ende veel scone gheestelike liedekens. Noch een liedeken van devocien ghemaect bi broeder Dirck van munster
|
1508
|
Den Haag KB: 228 G 35 (in facsimile) |
fe6r |
|
Dirk Geirnaert, naar bron, diplomatisch. |
|