|
|
|
¶ Dit liedeken gaet op die wise Cleue hoorne ende batenborch
SOlaes willen wi hanteeren
ende altoos vrolic sijn.
ende blijdelic houeren
met ihesus mijn minnekijn.
waer om so willen wi trueren
het en mach anders niet sijn
ten sal niet langhe dueren
dat ic bedruct sal sijn
¶ In al die werelt wijde.
en vindic niet so goet
dat mi mach maken blijde
dan ihesus mijn minnekijn.
hier om wil ic mi gheuen
hem te dienen tot alder tijt.
so wert ic van v verheuen
ende eewelic verblijt
¶ Hi is een heer der heeren
die schoonste die men vint
ic wil mi tot hem keeren
want hi ons seere mint.
gheen herte en can versinnen
die blischap die hi heeft bereyt
den ghenen die hem minnen
als die scriftuer ons seyt
¶ Hi is een bloem gheheten
seer suuerlic ende claer
hi is so hooch gheseten
al bouen der enghelen schaer
gheboren tot onser baten
van eender maghet bequaem
al bouen honich raten
es soeter ihesus naem
¶ Wanneer sal ic aenschouwen.
sijn ouer claer aenschijn.
och mochte ic hem behouwen
al inder herten mijn
wat mi mocht ouercomen
en soude ic achten niet.
waert so het soude mi vromen
so en had ic gheen verdriet.
¶ Och god wilt mijns ontfermen
doer uwen name fijn.
ende wilt ons doch beschermen
al van die eewighe pijn
ende wilt ons doch gheleyden
ende brengen int eewighe rijck
als wi van hier al scheyden
dat bidden wi al ghelijck | |
|
|
Coelde van Munster, Dierick (co-auteur),
Dit is een suverlijc boecxken in welcke staen scone leysen ende veel scone gheestelike liedekens. Noch een liedeken van devocien ghemaect bi broeder Dirck van munster
|
|
1508
|
| Den Haag KB: 228 G 35 (in facsimile) |
| ff2r |
|
| Dirk Geirnaert, naar bron, diplomatisch. |
|
