|
|
|
Dit liedeken gaet op die wijse O fiere nachtegael
OCh ligdi nv en slaept
o leuende gods sone
och ligdi nv en slaept.
hier bouen inden throne
stant op ende weest ghereet
en wilt doch tot mi comen
thoont ons v godlicheit
v godheit is so schone.
¶ Vie clopt daer aenden muer
om mine ghenadichede
die doot wert mi so suer
eer ic mocht maken vrede
den toren was so groot
hi dede den hemel sluyten
leert liden totter doot
oft ghi moet bliuen buyten
¶ O ihesus lieue heer
hoe sal ic bi v gheraken
dat leuen lust mi so seer.
ic en can gheen liden smaken.
het dunct mi swaer arbeyt
om troost so ben ic comen
thoont ons v godlicheyt
v godheyt is so schone
¶ Ghi waent dat ic ben scapen
ende dat ic v niet en kinne.
ghi mocht v seluen laten
ende lijden doer die minne
ic moest so vele lijden
soude hemelrijc ontsluyten
in lijden moet ghi verblijden.
oft ghi moet bliuen buten
¶ Ihesus gheminde heere.
hoe mocht v steruens lusten
dat cruys woech v so seer
ende ghi en mocht niet rusten
om onse salicheyt
droechdi een doornen crone
thoont ons v godlicheyt
v godheyt is so schoone
¶ Al stondi daer tot morghen.
so en mocht ghi niet versinnen
oft in v hert verborghen
hoe dat mi dwanck die minne
dat ghi sout sijn ontlast
ende hemelrijc ontsluyten
dus moet ghi liden last
of ghi moet bliuen buyten
¶ Ic sie den lichten dach
al doer die wolcken dringhn [dringhen]
ic sie dat niemant en mach
den wille gods volbrenghen
hi en hebbe verduldicheyt.
in liden waer dat ic come
thoont ons v godlicheyt
v godheyt is so schoone
¶ Ghi waent met alder lust.
des vleysch tot mi te raken
het heeft mi meer ghecost
hemelrijc te smaken
druc lijden ende seere.
doet hemelrijc ontsluyten
ghi moet noch lijden meer.
oft ghi moet bliuen buyten
¶ O die liefste die ic weet
ghi woont in hemelrijke
ic ben nv al bereet.
om te lijden blidelike
pine druc ende leyt
op dat ic v hebbe te loone
thoont ons v godlicheyt
v godheyt is so schone | |
|
|
Coelde van Munster, Dierick (co-auteur),
Dit is een suverlijc boecxken in welcke staen scone leysen ende veel scone gheestelike liedekens. Noch een liedeken van devocien ghemaect bi broeder Dirck van munster
|
|
1508
|
| Den Haag KB: 228 G 35 (in facsimile) |
| ff4v |
|
| Dirk Geirnaert, naar bron, diplomatisch. |
|
