|
Een oudt liedeken.
HEt daghet inden oosten Het lichtet oueral Hoe luttel weet mijn liefken. Och waer ick henen sal Hoe luttel weet mijn liefken
Och warent al mijn vrienden dat mijn vianden zijn Ick voerde v wten lande. Mijn lief mijn minnekijn Ick voerde v wten lande
Dats waer soudi mi voeren Stout ridder wel gemeyt ic ligge in mijns liefs armkens Met grooter waerdicheyt. ic ligge in mijns liefs armkens
Ligdy in ws liefs armen Bilo ghi en segt niet waer. Gaet henen ter linde groene Versleghen so leyt hi daer Gaet henen ter linde groene
Tmeysken nam haren mantel Ende si ghinc eenen ganck Al totter linde groene daer si den dooden vant Al totter linde groene
Och ligdy hier verslaghen Versmoort al in v bloet dat heeft gedaen v roemen Ende uwen hooghen moet dat heeft gedaen v roemen.
Och lichdy hier verslaghen. die mi te troosten plach Wat hebdy mi ghelaten So menighen droeuen dach Wat hebdi mi ghelaten.
Tmeysken nam haren mantel. Ende si ghinck eenen ganck. Al voor haers vaders poorte die si ontsloten vant Al voor haers vaders poorte
Och is hier eenich heere Oft eenich edel man die mi mijnen dooden Begrauen helpen can die mi mijnen dooden
Die heeren sweghen stille. Si en maecten gheen geluyt. dat meysken keerde haer omme Si ghinc al weenende wt. Ende si ghinc wederomme
Si nam hem in haren armen Si custe hem voor den mont. In eender corter wijlen Tot also mengher stont In eender corter wile
Met sinen blancken swaerde dat si die aerde op groef Met haer snee witten armen Ten graue dat si hem droech. Met haer snee witte armen
Nv wil ic mi gaeu begeuen In een cleyn cloosterkijn Ende draghen swarte wijlen. Ende worden een nonnekijn. Ende draghen swarte wijlen.
Met haer claer stemme Die misse dat si sanck Met haer snee witten handen dat si dat belleken clanck Met haer snee witte handen. | |
|
Een schoon Liedekens. Boeck inden welcken ghy in vinden sult. Veelderhande liedekens. Oude ende nyeuwe Om droefheyt ende melancholie te verdrijuen. Item hier sijn noch toe ghedaen Meer dan Veertichderhande nyeuwe/ liedekens die in gheen ander liedekens boecken en staen. Hier achter aen vervolghende [Antwerps liedboek]
|
1544
|
Wolfenbüttel Herzog August Bibliothek: A: 236.5 Poet |
f43r |
|
DBNL/werkgroep Joldersma, naar bron, diplomatisch. |