|
Een liedeken vanden mey
OCh ligdy nv en slaept. Mijn wtuercoren bloeme Och ligdi nv en slaept. In uwen eersten droome Ontwect v soete lief wilt door v veynster comen Staet op lief wilt ontfaen Den mey met sinen bloemen
Wat ruysschet daer aen die muer Dat mi mijn ruste berouet Die mi tsceyden maect suer. Die leit hier op gedooghe In minen arm so vast Wi en connens niet ontsluyten Mijn beddeken heeft sinen last plant uwen mey daer buyten
O suyuerlijcke iuecht Wilt nv v rusten laten Doet op dijn veynsterkijn Ende coemt v lief ter spraken Al om te vinden troost So ben ic hier tot v gecomen Staet op lief wilt ontfaen. Den mey met sinen bloemen
Al stondy daer tot morgen Ic en sal v niet in laten Mijn boel leyt hier verborgen Ghi en condt mi niet vermaken Mijn herteken op v niet en past Noch op gheen spel van luyten Mijn beddeken heeft sinen vollen last Plant uwen mey daer buyten
Ic sie den lichten dach Al door die wolcken dringen Ic sie die bloemkens schoone Al wt der aerden springhen. Ic sie die sterren claer Die verlichten inden throone Staet op lief ende wilt ontfaen Den mey met sinen bloemen
Waent ghi dat ic nv slape Het is anders dat ic dachte Die mey hout my in wake daer na mijn herteken wachte Niet als inder aerden wast Roosen bloemen oft ander virtuyten Mijn beddeken heeft sinen vollen last Plant uwen mey daer buyten | |
|
Een schoon Liedekens. Boeck inden welcken ghy in vinden sult. Veelderhande liedekens. Oude ende nyeuwe Om droefheyt ende melancholie te verdrijuen. Item hier sijn noch toe ghedaen Meer dan Veertichderhande nyeuwe/ liedekens die in gheen ander liedekens boecken en staen. Hier achter aen vervolghende [Antwerps liedboek]
|
1544
|
Wolfenbüttel Herzog August Bibliothek: A: 236.5 Poet |
f73v |
|
DBNL/werkgroep Joldersma, naar bron, diplomatisch. |