Home     Grasduinen     Over     Zoektips     FAQs     Disclaimer     Meertens Instituut         english

Nederlandse Liederenbank


Een oudt liedeken

UAn liefden coemt groot lijden
Ende onder wijlen groot leyt
Het vrijde een hertoginne
Een ridder wel gemeyt
Hi mindese seere hi hadse lief
Si en consten van grooter liefden
Te samen ghecomen niet

Die ioncfrouwe die was edele
Ende si ghinc eenen ganck
Al tot haers vaders poorte
Daer si dat wachterken vant
Och wachter mijns vaders wachterkijn.
Hoe rijck soude ic v maken
Woudt ghi gheloouen my.

Ick soude v wel gheloouen
Wel edel ioncfrouwelijn
Ontsage ic niet so seere
Den grooten heer vader dijn
Ick ontsie so seer dijns vaders thoren
Waert dat v yet misquame
Mijn leuen dat waer verloren

Mi en sal niet miscomen
Mijns vaders wachterkijn
Beyde ic v yet te langhe.
Singt op ende wachtet mi
Ende wachtet mi voor der manen schijn
Singhet op een goet nyeu liedekijn
Singhet op ende wachtet mi

Die wachter ontsloot die poorte
die ioncfrou die was bereedt
Den sadel worp si op haer paert
Si reedt ten holen steene waert
Daer si haer soete liefken niet en vant
Daer sadt die fiere nachtegale
Van minnen so wel en sanck

Nv segghet mi seyde si nachtegale
Wel cleyn wilt vogelkijn
Woudt ghi mi die bootscap draghen
Waer mijn schoon lief mach zijn
Hi nam die ioncfrou edele
Hi settese achter hem op zijn paert
Hi voerdese also verre tot zijnder moeder waert

Moeder hier is mijn soete lief
die ick vant ten holensteen
Vondise ten holensteen so voertse wederom
daer af soude comen groot leyt
daer af sal comen grooten noot
Daer salder eer morghen noene
Noch drie om wesen doot

Hi nam die ioncfrou edele
Hi settese achter hem op zijn paert
Hi voerdese wederomme
Ten holensteen waert.
Daer lach haer lief van rouwe doot
Al in zijns selfs swaert vermoort
Was dat niet iammer groot

Si nam daer dat selue swaert
Si settet op haer herte
Mer eer dat swaert ten haluen quam
Haer herteken dat haer brac.
daer lagen si beide van rouwe doot.
den ridder ende zijn soete lief
was dat niet iammer groot.

Die nacht die was seer doncker
Die mane en scheen niet claer
Scone weerde moeder gods.
Hoe salt met mi vergaen
Hoordy ons wachterken kermen niet
Ick duechte onser beyder dochter
Sal wesen in groot verdriet

Die heere die stont op
Ende hi ontstack een licht
Hi ghinc van bedde te bedde.
Hi en vant zijn dochter daer niet
En hoordy ons wachterken kermen niet
Ic ducht onser beyder dochter
Sal wesen in groot verdriet

Si namen daer dat goelijc wachterkijn
Si leydent op den disch
Si snedent in vieren
Ghelijc den salmen visch
Raet waerom deden si dat.
Om dat een ander wachterken
Soude wachten te badt.

Een schoon Liedekens. Boeck inden welcken ghy in vinden sult. Veelderhande liedekens. Oude ende nyeuwe Om droefheyt ende melancholie te verdrijuen. Item hier sijn noch toe ghedaen Meer dan Veertichderhande nyeuwe/ liedekens die in gheen ander liedekens boecken en staen. Hier achter aen vervolghende [Antwerps liedboek]
1544
Wolfenbüttel Herzog August Bibliothek: A: 236.5 Poet
f86v

DBNL/werkgroep Joldersma, naar bron, diplomatisch.