|
Een nyeu liedeken.
HEt was te nacht also soeten nacht
Dat alle die vogelen son_ghen
Te fieren nachtegale hief op een liet en sanck
Met zijnder wilder tonghen
Dat verhoorden twee gesellekens fijn
Twee geselleken van auontueren
Si namen mi minen fiere maghedom
Ick en mochter niet om trueren
Si namen dat ic veel lieuer hadde
Een vingerlinc root van gouwe
Maer bringhen zij mi dat wederomme thuys
En het sal hen noch berouwen
Het sat een schipperken al op zijn scip
Hi hoorde dat vrouken seer clagen
Gebreect v bier broot ofte wijn
Dat sal ick v doen halen
Mi en gebreect bier broot of wijn
Noch geenderhande dinghen
Ick draech een kint so cleyne kint
Ick en can die vader niet vinden
Draechdi een kint so cleyne kint
Condt ghi die vader niet vinden
So doet dat kindeken alle zijn gerief
Die vader sal v beminnen
en van uwen cleyne kinde.
Nv wil ic gaen trecken dat groene wout in
Die fiere nachtegael vraghen
Maer of si alle gesceyden moeten zijn
En dat eens twee liefkens waren
Wy waren ghescheiden mijn soete lief ende ick
Het is haer nae so wel berouwen
Wy souden also saen vergadert zijn
En woude si my zijn getrouwe
Goet en getrouwe sal ic v zijn
Een fiere gelaet sal ick v schencken
Wanneer ic ligghe inden arm van dijn
Op een ander sal ick dencken
Nv radick elcke ionghe maecht
Dat zij haer eerken bat besluyten
Wanneer dat willeken is gedaen
En dan is die vrientschap wte | |
|
|
Een schoon Liedekens. Boeck inden welcken ghy in vinden sult. Veelderhande liedekens. Oude ende nyeuwe Om droefheyt ende melancholie te verdrijuen. Item hier sijn noch toe ghedaen Meer dan Veertichderhande nyeuwe/ liedekens die in gheen ander liedekens boecken en staen. Hier achter aen vervolghende [Antwerps liedboek]
|
|
1544
|
| Wolfenbüttel Herzog August Bibliothek: A: 236.5 Poet |
| f110v |
|
| DBNL/werkgroep Joldersma, naar bron, diplomatisch. |
