|
|
Ghelijckerwijs vol rouwen Sadt tvolck van Israel In d'Babiloensch landouwen Deur tyrannije fel
Soo hebben wy gheseten In tsoete Nederlant Vol lijdens onghemeten Door Spaingsche iock, en bant.
Maer God heeft ons ghesonden Van Nassouwen een helt Welck heeft den bant ontbonden, Die ons dus heeft ghequelt.
Daer naer is dlot ghevallen Op u Matthias goet, Die voortaen sult voor allen Ons qualen gheven boet.
Ghy sult te vreden stellen Onsen lantsheere ontpayt, En die leughen mellen Die van ons is ghesaeyt.
So dat wy van Matthias Hopen dat hy sal sijn R[?]echt als eenen Meesias Onsen verlosser zijn.
Dus sijt ons wel ghecomen Eel bloet van Oostenrijck: Stelt u altijt tot vromen, En vordert ons ghelijck:
Op dat u wort ghegeven Des Conincks lof en faem, Van jongheren[?] verheven, Dair ghy af voert den naem.
Al sijt ghy ionck van iaren, Weest daerom niet beswaert: Pompeius was vervaren Al was hij onghebaert.
En Scipio de' swichten Der Poenen moet en vreught, Doen hyse quam beuichten Sijnde in ionghe ieught.
En Alexander moedich Diemen den grooten noempt, Voor ionck ende voorspoedig, Ja nog tot nu beroemt.
Betrout op Godt almachtich, En weest van moede coen. Al is den vyant crachtich, Hy en can ons niet doen.
Oorlof Prince hier mede, En wel ghecomen sijt, Tot Brussel inde stede Nu en tot alder tijt.
Godt die u heeft vercoren, Verleen u goeden raet, Eertshertoghe hooghgeboren, En bevry u van tquaet. | |
|
Houwaert, J.B.,
Sommare beschrijvinghe vande triumphelijcke Incomst vanden doorluchtighen ende hooghgheboren Aerts-hertoge Matthias, binnen die Princelijcke stadt van Brussele, in t'jaer ons Heeren M.D.LXXVIII. den xviij dach Januarij. Mitsgaders die tanneelen, poincten, figuren ende spectaculen, die inde voorseyde incompste (ter eeren van sijne doorluchticheyt) zijn verthoont gheweest, met meer ander saken, die doen ter tijt gheschiet zijn.
|
1579
|
Den Haag KB: Pamflet 329 |
p87 |
|
Martine de Bruin, naar bron, diplomatisch. |
|