|
|
¶ Mit desen niewen iare so wert ons openbare hoe dat een maecht vruchtbare die werelt heeft verblijt Geloeft moet sijn dat kindekijn gheeert moet sijn dat maechdekijn nv ende ewelijc tot alre tijt
¶ Si baerde sonder pijne ende bleef een maget fijne des sondaers medicijne dies hebben die ioden spijt
¶ Hoe wel was haer te moede doen si in vleisch ende bloede aensach haers hartsen hoede den heer der werelt wijt
¶ Die enghelen songen schone lof inden hoghen trone ter eren end ten loue den kijnd des seker sijt
¶ Doe achtdaech waren leden doe wert dat kijnt besneden al nader ioedscher seden die ons van sonden vrijt
¶ Drie coninghen dat vernamen te bethleem dat si quamen si offerde drie gauen den kijnd gebenedijt
¶ Maria maget simpel droech haer lief kijnt ten tempel den vrouwen een exempel dies si haer niet vermijt
¶ Doe symeon die oude tkijnt sach sijn hert vervroude hi sprac dat hi ons soude van sonden maken quijt. | |
|
Handschrift Koning
|
1500-1510
|
Brussel KB: II 270-II (f. 121-176) |
f122v |
|
Jeske van Dongen, naar bron, diplomatisch. |
|
© 2024 KNAW/Meertens Instituut