|
|
¶ Maria sart van edeler art een rose inden doren du hebs mit maht [sic] herweder bracht dat lange was verloren doer adams val di heft gewalt sint gabriel versproken help dat nit wert gewroken mijn sund en sculd verwerf mi huld want gen troest is wer du nit bist bermherticheit verwerue int leste end ic bid nit wend van mi in mine sterue
¶ Maria milt du hebst ghestilt der altvaders verlanghen die iaer ende dach in wee ende clach die voerhel hielt geuanghen tot alder tijt wunsten si strijt al dat des hemels poerte te rijten alle oorte ende hi afqvaem die hem benaem hoer sware pijn ende dat doer dijn kuisioncfroulichs gheberen is afghestelt daer om di telt alder werlt een croen der eren
¶ Maria reyn du bist alleyn der sondaer troest op erden daer om di haet die ewich raet een moeder laten werden des hoechsten heil daer doer toordeil ten iongsten dage wert rechte hout mi aen dijne pflechte o werde vrucht al mijn toevlucht heb ic tot di aen tcruys bis mi mit sint iohan gegheuen dattu oec mijn moeder sals sijn frist hier ende daer mijn leuen
¶ Maria claer du hebs voerwaer mit groter smerten ghegangen doe dine vrucht gants mit ontucht onsculdlic wert gheuangen om mijn misdaet crijch mi genaet te beteren hier mijn leuen want ic bin hier omgheuen mit sware pijn ende dat doer mijn groot sund ende scult ic vol verdult aen lijf ende allen enden o werde roos mijn crancheit loos dijn genaed niet van mi wende
¶ Maria sart vermeret wart in di groot leit ende smerte doe dijn kijnt doot een speer mit noot doerstac sijn sachte herte des bloedes saft crenct di dijn craft van leid wordes du te sencken iohan dedense wencken hi liep aldaer nam dijner waer doe di dat sweerd dijn hert verseerd daer van symeon saghet o ioncfrou werd son lucht ende erd den doot dijns kijnts beclaecht
¶ Maria scoon in hemels troon wen ic van hier sal scheide so coem tot myr bescud mich scyr dat mi doch niet verleide die valsch sathan want ic niet can sijn duuels list erkenne noch moet ic yo van hene omwerp mi oec dijns mantels foc wanneer dijn kynt mijn recht gants wynt so wise vrou dijn borsten dijn soen iesu sprec ghif mi nv den sondar ewich troesten
¶ Maria goet wen in onmoet die vader van mi wende so bid dat daer dijn soon scic claer sijn syde voete ende hende dan mach niet seer die vader meer teghen mi een ordel spreken oec mach hi sich niet wreken god heilich geest der eerst beweest soet genadicheit den is bereit drieuoldelike goede also werd ich salich doer dich voer sonden mi behoede
¶ Maria fijn dijn claer aenschijn verlucht den hoechsten trone daer di mit eren van twalef sterren wert opgheset een crone drieualdicheit heeft di becleit mit hoger ghenaden omgheuen maria frist mijn leuen so menigen dach ic bidden mach o ioncfrou soet help dat ic buet mijn sund voer mijnen ende wen mijn hert brict tgesicht verscrict biet mijnder siel die hende
¶ Maria vrou help dat ic scou dijn kynd voer minen ende scic sint michiel tot mijnder siel dat hi se breng behende in themelrijc daer alghelijc die englen vrolic singhen haer stemmen tot hel erclincken heilich heilich du bis heilich o starcke got van sabaoth regierst ghewaldichliken so heeft een eynd al mijn elleynd ende vreuwe mi ewichliken
¶ Maria claer du bist voerwaer figurlic wel te beduden int cudsvel fron doe gedeon van god creech macht te strijden bedudest wert du bist die poert die ewich blijft besloten van di is wtghesloten dat ewich woerd ghesloten gaerd gheteykend born claer als die son beduyt voer lange iaren van my niet went dijn trou int ent als ic van heen sal varen
¶ Maria reyn ioncfrou alleyn in di is gheen ghebreke dar leeft gheen man die mach of can dijn glori groot wtspreken dijn hoghe loue swemt eulic boue in hemel ende op erden dijns gelijc mach nyemeer werden reyn creatur o ioncfrou pur wen daer toe compt dat mijn mont stompt mijn siel van lijf sal keren so denc daer aen dat ic di haen hier meed ghedacht te eren | |
|
Handschrift Koning
|
1500-1510
|
Brussel KB: II 270-II (f. 121-176) |
f123v |
|
Jeske van Dongen, naar bron, diplomatisch. |
|
© 2024 KNAW/Meertens Instituut