|
|
|
¶ Truren moet ic nacht ende dach ende liden swair verlangen
des lidens naem ic ghern verdrach dat mi heeft onbevangen
verdriet comt mi so menichfout en truren hout mi in haer gewout
ic en cans doch niet ongangen
¶ In wat plaetsen dat ic bin ic moet des lidens wachten
dar comt gheen vroechd in mine sin bi dach of oec bi nachten
mit vresen bin ic ombeuaen dat cost mi also menighen traen
god wil mijn druc versachten
¶ In alle deser werelt wijt en weet ic druc tonvlieghen
men vijnt nyet anders inder tijt dan valscheit ende bedrieghen
want trou is nv ghebleuen doot die waerheit is in groter noot
si wert verdruct mit liegen
¶ Och rijc heer god hoe we is mi in deser werlt te wesen
mocht ic van sorghen wesen vri so wair mijn hert genesen
mer laci het is al om niet hier is nyet anders dan verdriet
ende altoes anxt en vresen
¶ Druc liden moet mijn eighen sijn ic machs doch niet ontuaren
maria reyne maghet fijn wilt mi altijt bewaren
ghi sijt mijn troost al op ertrijc ic wil v dienen trouwelijc
al leefde ic dusent iaren
¶ Och rijc heer god hoe wel lust mi wt deser werlt te sceiden
maria vrou weest mi dan bi ende wilt mijn siel gheleiden
al is mijn auentuer nv cranc als ic coem inder englen sanc
sal droefheit van mi sceiden | |
|
|
Handschrift Koning
|
|
1500-1510
|
| Brussel KB: II 270-II (f. 121-176) |
| f127v |
|
| Jeske van Dongen, naar bron, diplomatisch. |
|
© 2024 KNAW/Meertens Instituut
