|
|
¶ Hoe lude sanc die lerar opter tynnen so wie in swaren sonden leeft god laets hem wel versynnen dat hi sich keert ter doechden waert eer hem den wech die doot ondergaet sij vroeden diet versynnen
¶ O edel mensch denct ghi moet ymmer steruen en sij di niet van sonden vrij gods rijc so moet ghi deruen ghi hebt so dic versuymt den tijt en dede gods ghenadicheit die hel waer dijn vrij eruen
¶ Ende dat verhoordeen [sic] ionglinc ionc van iaren nv seg mi lerar wel bekent hoe moechdi dus ghebaren ic mach noch leuen menichen dach ende vroechd hanteren als ic plach ende dan te goden varen
¶ Die lerar sprac wat wildi v vermeten siet waer sijn v ghesellen gheuaren die bi v waren gheseten si waren van iaren dijns ghelijc van hauen waren si also rijc die wormen hebbense gheten
¶ Die ionglinc sprac ic en can mij niet bedwingen ic moet ghebruken mijnre ioecht mit dansen ende springen si moeten steruen die veyich sijn wel op nv laet ons vrolic sijn god salt noch lang ghehengen
¶ Die lerar sprac die vroechd mach di niet duren want het verkeert so menichsyns in eenre corter vren och waerstu van die synne mijn dat v nv duncket vroechde sijn ten waer dij niet dan truren
¶ Die ionglinc sprac du moechs mi niet ontraden dat ic die werelt laten sal ende leuen int versmaden ic wil volbrenghen dat ic can die vroechd der werelt staet mij an ic en canse niet versmaden
¶ Die lerar sprac ghi sijt seer vten keren dat ghi der werelt vroechde kiest voer tleuen ons liefs heren siet toe dat ghi soe niet en kiest dat ghi dat rijke gods verliest welc ewelijc sal dueren
¶ Die ionglinc sprac soud ic gods rijke deruen soe mocht ic sorghen voer mijn lijf dat ic dus soude steruen ic heb ghemist den rechten pat waer sal ic heen bericht mi dat ic ontsie der hellen eruen
¶ Die lerar sprac wildi in doechden risen den rechten wech tot gode waert sal ic v gherne wisen daer nymmermeer en is verdriet doet altijt goet ende laet des niet god sal dijn siel wel spisen | |
|
Handschrift Koning
|
1500-1510
|
Brussel KB: II 270-II (f. 121-176) |
f145v |
|
Jeske van Dongen, naar bron, diplomatisch. |
|
© 2024 KNAW/Meertens Instituut