|
|
In tono laycali. Het reet een ridder iaghen uut etcetera.
? Een blide moet in tegenspoet doet alle liden wiken want hi bekent diet hem toe sent hi sal hem niet beswiken want god altoest den genen troest die sijn beuaen mit liden hier om hebt moet in tegenspoet na druc so coemt verbliden
? Dar left gheen man die mach of can dat liden hier ontganghen al scout oec hijt mit alder vlijt nochtans wert hi gheuanghen mer wie ter tijt hier wert castijt ende hem daer in can liden na dit verdriet dat hem ghesciet sal hi in troest verbliden
? Hi is geuaen wil hijt verstaen mit liden vast ghebonden die als ic waen soude vergaen mit vroechd in val der sonden mer dat verdriet en henges niet dat hi dus coemt in vresen ende diat onspoet dat hem ghemoet leert hem voersichtich leuen
? Die dan bekint dat hem god mint dien hi castijt mit liden ende tloen besint ende ondervint wat wil hi dan vermyden hier om mit vlijt gaet aen den strijt so moechdi tsegen winnen want wie onspoet lijd mit oetmoet heeft stadich vroechd van binnen
? O mensche goet hier om wes vroet en wilt gheen liden wiken want niemont [sic] vri gheloues mi en leuet op artriken hier om verdraecht al onuersaecht ende wilt dat wenich achten wortstu gewont in dinen gront iesus salt di versachten
? Dit self is claer ende openbaer inder scriptur bewesen dat hem gemoet menich tegenspoet die god genaem sal wesen want int ghemein den herten rein so veel op valt te liden als dat weldaet van goet in [- wt dir -] quaet verwandelt tallen [- verkint in -] siden
? Een trostelic woort heb ic gehoort dat doet mi vrolic liden dat god hier loont ende namaels croont die vromeliken striden hier om west vro doet oec also ende laet al ouergangen der vroechden croon int hemels troon salstu daer voer onfanghen
? O lijdsamheit daer is gheseit dat ghi die croen sult dragen die dan sijn scult quijt mit verdult en derf hem niet beclagen hier om so lijd een corte tijd ten sal niet ewich duren want god verblijd dien hi castijt lijd vrolic sonder truren
? Wie tliden vlicht dat hem aenswicht die mach gheen troest ghewinnen noch hi en kent dat testament dat iesus leet uut mynnen doen hi ghewont aen tcruce stont loefdhij daer voer te gheuen in deser tijt vreed en iolijt ende namaels teuwigh leuen | |
|
Handschrift Koning
|
1500-1510
|
Brussel KB: II 270-II (f. 121-176) |
f146v |
|
Jeske van Dongen, naar bron, diplomatisch. |
|
© 2024 KNAW/Meertens Instituut