Home     Grasduinen     Over     Zoektips     FAQs     Disclaimer     Meertens Instituut         english

Nederlandse Liederenbank


Dit lyedekijn gaet op die wijse: 'Mijn moederkijn is ghestoerven, diemy ten besten riet; si gaven my den ouden man! Maer om sijns goets wille ghinc' etcetera.

1 [xxv/38r] Daer isser mer dan ic ghevinden can,
Des en geloeve ic wijf of man:
Och, des en gheloeve ic wijf of man,
Of menschen die spreken met mont,
Dien ic gheloeve tot enigher stont,
Dien ic gheloeve tot enygher stont,
Ic en kense eerst wel van gront.
Dien etcetera.

2 Als ic die werelt wel aen sie,
Soe en vindic daer waerlijc niet dan twee:
Soe en vindic daer waerlijc niet dan twee,
Ontrou ende ongheval.
Set ic mijn hoep op creaturen,
Ic bin bedroghen al.
Set ic myn etcetera.

3 Als ic, als ic my tot die menschen keer,
Al soeck ic trou, ic en vinder ghen:
Al soeck ic troest ic en vinder ghen,
Soe ist my al om niet.
Soe wie hem totten menschen kert,
Soe wie hem totten menschen kert,
Die heeft altoes verdriet.Soe wie hem etcetera.

4 Ic heb, ic heb die mensche soe wel besocht,
Wee hem, die daeran is beknoft:
Wee hem, die daeran is beknoft,
Ende hem des niet en onduet!
Sel hij hem weder inwaerts keeren,
Sel hij hem weder inwaerts,
Het cost hem vleys ende bloet.
Sel hij hem weder etcetera.

5 Ic heb, ic heb die mensche soe wel beproeft,
Ic en vinder niemant die my ghenoecht:
Ic en vinder niement die my ghenoecht,
Of die is van mijnen sin.
Ic wil alle menschen buten sluyten,
Ic wil alle menschen buten sluyten,
Ende laeten Heer Jhesus in.
Ic wil alle etcetera.

6 Och mens, och mens, wat hebstu my ghedaen,
Dat ic mijn hoep op di liet staen:
Dat ic mijn hoep op di liet staen,
Des heb ic rou soe groot.
Ic wil my voert aen Jhesus houden,
Ic wil my voert aen Jhesus houden,
Dat is [38v] my den besten coep.
Ic wil my voert aen Jhesus houden etcetera.

7 Och Jhesus, och Jhesus Heer, ic claghe U mijne noet,
Al leefve ic nu, mijn hert is doot:
Al leefve ic nu, mijn hert is doot,
Dat heeft ontrouwe ghedaen.
Och verwaert dat ic henee gae,
Och verwaert dat ic henee gae,
Mit rou bin ic bevaen.
Och verwaert dat ic etcetera.

8 Och Jhesus, och Jhesus Heer, ic claghe U mijne rou
Want hadt ghedaen U groote trou:
Ic waer om bleven al.
Maer al op Uwen bitteren doot,
Maer al op Uwen bitteren doot,
Wil ict verdraghen al.
Maer etcetera.

(1) Daer iss

Handschrift Meerman
[1525 ca.]
Brussel KB: II 2631
f37v

H. Joldersma, naar bron, kritisch.