Home     Grasduinen     Over     Zoektips     FAQs     Disclaimer     Meertens Instituut         english

Nederlandse Liederenbank


Dit lyedekijn gaet op die wijse: 'Ic sie die morghesterre', ende isvan twee conninxkijnder die melkander lief hadden. Ende die coninc dede sijn dochter in een cloester.Ende dien anderen conninxsoen spranc in die se om haer toe te spreken. Ende si liet eenkaers op ter tinnen setten, omdat hij sien souden. Ende een quade non lietse uut doen, omdat hijverdrencken souden ende niet aen comen.

1 [xxvii/40r] Tusschen se berch hoghe
Daer leit een water wijt;
Daer wonnen twee edel conninxkijnder,
Sy en connen tsamen comen niet.
Daer etcetera.

2 En dat vernam een nonnee,
Een non, God gheef haer al mijn leit!
'En wat beduyt die kaersse
Die opter tinnen steyt?'
En wat be etcetera.

3 'En doet daer uut die kaersse,
Die opter tinnen stuet!
Soe moeghen alle onse nonnen
Van binnen wesen wel behuet'.
So moeghen etcetera.

4 Men deder uut die kaersse.
Men dorstet laten niet.
Doen verdranck dat edel coninxkint,
Het en konst die cante raken niet.
Doen verdranc etcetera.

5 'Och vader', seidt sij, 'vader,
Mijn hoeft doet my soe we!
Moet ic wel eens ghaen wanderen
Al tenden die wilde see'.
Moet ic wel etcetera.

6 'Och visser', seidt hij, 'visser,
Mijn guetlijc visserkint,
Nu leit mijn dochterkijn wanderen
Ende brentsee my weder thuys.'
Nu leit etcetera.

7 'Och visser', seidt sij, 'visser,
Mijn guelijc visserkint,
Nu spreit daer uut u netken
Om een verdroncken lief.'
Nu spreitdaer etcetera.

8 Hi spreide daer uut sijn netkijn.
Dat loet sanc op die gront;
Hij brocht dat edel conninxkint
In alsoe korter stont.
Hij brocht etcetera.

9 Si nam hem in haeren ermmen,
Sij kuesten voer sijnen mont,
Veel meer dan hondertwerven
In alsoe corter stont.
Veel meer dan etcetera.

10 'Och visser', seid sij, 'visser,
Mijns vaders visserkint,
Nu gruet mijn mijn vader ende moeder ser,
Si en sien myn nu [40v] nochnummermeer.'
Nu gruet my mijn vader ende moeder etcetera.

11 Nu sijn daer twee schoen lyeven doot:
Och waer so sel mensee graven?
Onder den roosen eghelentier,
Dat graft sel roosen draghen.
Onder etcetera.

(1) Tusschen see berch etcetera.

Handschrift Meerman
[1525 ca.]
Brussel KB: II 2631
f39v

H. Joldersma, naar bron, kritisch.