Home     Grasduinen     Over     Zoektips     FAQs     Disclaimer     Meertens Instituut         english

Nederlandse Liederenbank


Dit is een liedekijn van vrou Venis ende van heer Danel, en hoe dat hi van haer strec ende ginc te Romen.

1 'Her Danel, ghy sijt soe schoenen man,
Ghi staet in minen sinnen.
Nu, laet ons in die camer gaen
En wesen daer met vroechden inee,
E ende E, met vroechden inee!
Nu, laet ons etcetera.'

2 'Dat en doe ic niet, dat laet ic staen,
Vrou Venis', seit hy, 'vrouwee,
Ic heb Maria, die Moeder Gods,
Ghelovet, liefgee, mijnre trouwe,
E ende E, mijnre trouwe.
Ic etcetera.'

3 'Heb ghy Maria, die Moeder Gods,
Ghelovet juer trouwee,
Soe gaetes Haer of, ende coemtes my an!
Ten sel ju, liefgee, niet berouwen,
E ende E, niet berouwee!
Soe gaettes Haer of etcetera.'

4 'Ghin icx Haer of en quam ic es u an,
Ic vuer uut mijne sinnen:
Als ic u driewerf nuchtere aensie,
My dunct, ghi sijt die duvelinnee,
E ende E, die duvelinne!
Als ic u driewerf etcetera.'

5 Heer Danel strec te Romen waert,
Al in die guede steden.
Daer ghinc hy voer die paeus staen
Met also groter oetmoedicheden,
E ende E, met groter oetmoedichede.
Daer ghinc etcetera.

6 [41v] Hi sprac met groter vuergicheit,
En met also grooter berouwee:
'Ic heb ghesondicht seven jaer
Al met vrou Venis, die valsche vrouwee,
E ende E, die valsche vrouwe!
Ic heb ghesondicht seven jaer etcetera.'

7 'Heb gy ghesondicht seven jaer
Al met vrou Venis, die vrouwee,
Soe en moechdi nu noch nummermeer
Dat aenschin Gods aenschouwee,
E ende E, dat aenschin Gods aenschouwen!
Soe en moechdi nu noch etcetera.'

8 'Och, mach ic nu noch nummermeer
Dat aenschin Gods aenschouwen,
Soe wil ic weer in den berch gaen
Al by vrou Venis, die valsche vrouwee,
E ende E, die valsche vrouwe!
Soe wil ic weer in den etcetera.'

(1) 'Heer Danel, ghi etcetera.'

Men seit, dat die paeus hem gaf eenen dorre stoc, ende dat hy die in die aerde sette soude. nde waert dat hy bloeynde wort, soe soude sijn sonde vergheven sijn. Ende die stoc wort bloeynde. Ende men socht her Danel ende men vattes niet. Men seit, dat hi met twee sijnre susteren kijnderen wech ghestreken was. Ist al waer dat men seit, so ist dit mee waer. Maer dat Heilich Evengelij gheloef ic bet. Dit ende van allen bevele ic God.

Handschrift Meerman
[1525 ca.]
Brussel KB: II 2631
f41v

H. Joldersma, naar bron, kritisch.