|
|
|
Dit lyedekijn gaet op die wijse: 'Wildi horen een nuwe liet? Dat sal men u singen, Hoe dat mijn heer Serloes, Die Lukenaers woude verwinnen'.
1 Ick wil verhoechgen mijnen sin,
Ende laten overlijden
Daer werelts vroechde ende al haer mijn.
Tot Jhesum wil ic my tyden.
Daer werelts vroechde etcetera.
2 Hy is myn troest, mijn toeverlaat,
In alle mynen liden.
Hi ist daer al myn sin toe staet,
Hi doet myn hert verbliden.
Hi is
3 [42v] Eens sjaers in mijnre jongher joecht,
Doen dwaelde ic uuten paden.
Maer Jhesus heeft met Sijnre doecht
mijn sinnen nu beraden.
Maer Jhesus heeft met etcetera.
4 Sijn minne is soeter boven al
Dengenen die see smaken.
Soe wie wil gheven al om al,
Die sel daertoe gheraken.
Soe wie wil gheven al etcetera.
5 Vriheit is een edel schat;
Die dien wel can bewaren,
Sy leyt hem in den rechten pat,
Hij en derf voer nyemant varen.
Si leyt hem in den etcetera.
6 Sy sijn van herten ongheschickt,
Die creaturen minnen.
Maer diet al om Jhesus laet,
Die sel veel vreeds ghewinnen.
7 Conste ic my selfve wel uutgaen
Ende alle dinck vergheten,
Jhesus sel my soe wel ontfaen,
Sijn min is onghemeten.
8 Recht minlick is Sijn fyer ghelaet
Ende Sijn ghenoechlick wesen.
Hi is mijn troest, mijn toevaerlaet,
Hi doet mijn hert ghenesen.
Hy is mijn troest etcetera.
9 In Hem soe vind men al gheheel
Soe wat men mach begheren.
Hy is certeyn mijns hertsen greyn,
Hi doet mijn hert verbliden.
Hi is certeyn mijns etcetera.
10 Suverlijck is Sijn claer aenschijn
Boven hondert dusent sinnen.
Sijn minne verblijt dat herte mijn,
This recht dat ic Hem minne.
Sijn minne verblijt etcetera.
11 Trou is Hi, in alre noet,
Sijn minnaers tot allen tijden.
Hij staet hem by in alre noet
Ende doetse seer verbliden.
Hi etcetera.
12 Vrienden ende maghen gaen hem oef
Ende nemen die aertsche haven.
Die werelt leent hem alleen een graft,
Daer wort hi in begraven.
13 [xxx/43r] Sijn minres vergheten hem haestelyck
Ende kyesen schyer een ander.
Mer Jhesus min duert ewelijck,
Want Hi en doet gheen verander.
Mer Jhesus min etcetera.
(1) Ick wil verhoghen etcetera. | |
|
|
Handschrift Meerman
|
|
[1525 ca.]
|
| Brussel KB: II 2631 |
| f42r |
|
| H. Joldersma, naar bron, kritisch. |
|
