|
|
|
Eyn Liedeken des lieflicken Volckes.
Verblydet u alle lustich in saysoene,
Want vruecht is nu in Cryt,
hebt gueden moet mit herten coene,
O Syon maeckt jolyt,
want siet, hier is den tyt,
daer langk van is geschreven,
is nu voer Ogen claer,
Verblydet mit vreuchden, die over syt gebleven,
en vreset nicht ein haer.
2.
Comt voort ghy gerechten van norden unde suden
blaest nu den Horen snel,
van Oosten und Westen laet u stemme luyden,
want hier is Emanuel,
al tegen Babel fel,
laet u Trompetten clincken,
haer herten syn versaecht,
blaest op mit u Basuynen, wilt Godes gedincken,
die twisten nu verjaecht.
3.
Die leste Schale is nu geschoncken,
al ener Babels ryck,
sy strukelen, sy twisten, als waren sy droncken
dat is nu haer Musick,
haer wijssheit mit pracktryck
die comet al tho schanden,
ydt is belachens weert,
verhuecht u in Godts rechten in alle Landen,
Godts licht ons nu verclaert.
4.
Tryck der Beesten is nu verdonckert,
daerom so maeckt u bly,
hier is ydt Licht der waerheit, als ein Pronckert,
syn Ryck dat is ons by,
die Waerheit maeckt ons vry,
hy stelt ons hert in vreden,
mit Godt syn wy gepayt,
tot ons is syne Liefde, alst Hooft tot syne Leden,
Gots leven ons verfrayt.
5.
Synen Lusthoff, die voer ons was gesloten,
die is nu geopent fyn,
den Boom des levens is uutgesproten,
syn vrucht is Medecyn,
drincket nu der Lieffden Wyn,
midt blyden gemöde,
Godes ryckheit nicht en mist,
roersichtich mit behuede, levet als die vroede,
wacht u van alle twist.
6.
Die Sonde, die Doot, liggen nu verslonden,
al mit haer dwaessheit groot,
Duvel und Helle, die ons hat ghebonden,
syn gecksmer [?] is nu bloot,
Dat hemmelsche Broot,
dat die Siele spyset,
in Gots wesen jnet,
Tryck des nyewe mensch, uut Godt verryset,
dit is nu ons present.
7.
Zin vredsam Ryck is ons verschenen,
also die Schrifft vermelt,
hier en is geen langer suchten, kermen noch stenen,
u herte nicht meer en quelt,
mit ons u nu verselt,
in dat hemmelsche wesen,
is onsen Coeninck siet,
hy verlichtet ons alle, so wy lesen,
singt hem dit niewe Liedt.
8.
Ghy Gotlicke Prinssen, ghy Volck des Heren,
die onpartydich staen,
comt nu alle wilt vruecht vermeren,
die waerheit wilt ontfaen,
Godst geest is op die Baen,
die Werlet sal hy straffen,
van hare gerechticheit,
die vermetele wysen mit haren blaffen,
die worden neer geleit.
Amen | |
|
|
Niclaes, Hendrik,
Van dat Geestelicke Landt der belofften
|
|
[1553-1555?]
|
| Amsterdam UB: OK 65-555 (6) |
| fD1v |
|
| Transcriptie naar bron, MdB 2016 |
|
