Home     Grasduinen     Over     Zoektips     FAQs     Disclaimer     Meertens Instituut         english

Nederlandse Liederenbank


1 In hopen wil ic vrolijc leven,
In hopen wil ic vrolijc leven.
Al heeft Hi my nu troest ontseit,
Ic hope Hi en sel mi niet begeven.

2 Rou te maten is mi so goet,
Want ic mi selven troesten moet.
Met recht mach ic wel suchten ende wenen,
Ic moet my selven troesten alleen:
Mi en is geen troest van Hem gebleven.

3 Als ic lach, so scijn ic vro,
Nochtans en ist niet alsoe!
Ic en mach van harten niet vrolijc sijn,
Eer mi vertroest die Liefste, en die Liefste mijn.
Ic en mach etc

4 Och, ende och, wat mijns ghesciet,
Hoe merre lief, hoe meerre leyt.
Och, alst daer op een sceyden gaet,
Des bin ic wijs, al ist my leeyt.
Och alst daer etc

5 Och lieflic Lief, Dijn minlic aenschijn:
Moet ic des ummer derven,
Mach my daervan gheen heil ghescien,
So wensche ic om een sterven!
Mach mi daer van etc

6 Nu wel henen, laetet sijn,
Alleyn so wil ics bliven.
Met droever harten vrolijc sijn,
Sel ic in eeren bliven.
Met droever etc

7 Ghedenct mijns, Lief, des bid ic Di,
Laet my Dijn hulde verwerven!
Hoe verre dat ic van Di vlye,
Dijn eyghen wil ic sterven.
Hoe verre dat ic etc

(1) In hopen wil etc

Handschrift Meerman
[1525 ca.]
Brussel KB: II 2631
f52v

H. Joldersma, naar bron, kritisch.