|
|
Een nieu Liet/ aen die van Hollant en Zeelant/ om afstant te doen van hun rebellicheyt/ ende gaet op de wijse: O Nederlant ghepresen/ Beclaecht meucht ghy wel zijn. Holland/ Zeeland laet v vermanen Tot Peys en Vrede t'is noot Legt af v bloedighe vanen Die ghy voert met nijt seer groot/ Ghy en hebt gheen oorsaeck wapen oft cloot Te voeren met rebellie bloot/ Teghen Philippus uwen Prins minoot.
Hy is een Prince saechtmoedich/ Sijn wercken ghetuyghent wel/ Keert weder tot hem spoedich/ Drijft wt tyrannich opstel/ Waerom blijfdy doch dus rebel/ Laet varen den twist t'is kinderspel/ Ontfangt v Ouerheyt t'is Godts beuel.
En wilt niet meer gheloouen/ Dees muytmakers boos en quaet/ Sy souden v gheerne verdoouen/ Maer en wilt niet volghen haren raet/ Neemt aen den Peys tot uwer baet/ Ontfangt dat Edel Conincklijck saet/ Wilt van v weeren alle twist en haet.
Die u noch persuaderen/ Tot Oorloch met ghewelt/ Die en soecken niet dat ghy meucht floreren/ Maer sy haken naer goet en ghelt/ Met eyghen baet sijn sy verselt/ Den armen Boer die wort ghequelt/ En den Coopman wort ghekneuelt opt velt.
Daerom en wilt niet versmaden/ Den Peys u van Godt ghesant/ Drijft wt die valsche raden/ Die bederuen v edel Landt/ Al hadt ghy noch yemant tot u bystandt/ Sy moghen noch worden v vyandt/ En bestrijden v aen elcken cant.
Dit en is gheen wonder om hooren/ Want rebellie Godt mishaecht/ Ten lesten sal hy hem verstooren/ En v Landen sullen worden gheplaecht/ Godt is lanckmoedich hy verdraecht/ Neemt aen den Peys eer ghyt beclaecht/ Soo en wort ghy bedorven of veriaecht.
Dat ghy v meynt te verlaten/ Op v Forten en Waterlanden wijt/ Als Godt wilt ten sal v al niet baten/ Dus wilt aflegghen desen bloedighen strijt/ Weert wt t'fenijn van haet en nijt/ Neemt aen den Peys wie dat ghy sijt/ Wilt v bedencken/ want t'is meer dan tijt.
PRINCE Oorlof Hollanders met desen/ En Zeelanders groot en cleyn/ Wilt aenueerden den Pays ghepresen/ Weert dees Oorloghen wt v pleyn/ Ontfangt uwen Prince met goeder meynt/ Sy sal v omhelsen wt liefden reyn/ En vergheuen v misdaden ghemeyn. FINIS.
Gheuisiteert ende toeghelaten by my Siluester Pardo, Licentiaet inder H. Godtheyt, Cononinck vanden Domkercke van Antwerpen, ende visitateur der Boecken | |
|
BECLACH, Van die van Hollant en Zeelandt
|
1598
|
Brussel KB: VB 10.204 VIII A 15 |
fA8r |
|
Martine de Bruin, naar bron, diplomatisch |
|