|
|
Hoort alle die zyt van Bachus bende End hu naer vastenavendt dwynght Eer datmen hu de zomer zende Doch hu ghelt niet gheel verdrynct Maer properlick by maeten schijnct Fraey ghezondt wordt ghy ghepresen En wat ghy doet, dit overdynct Moorghen moet ghy sober wesen
Die versmeert nu groot ghelach En metten theerlyngh tghelt verdoet Daer ghy meer dan eennen dach Thuwen huuse by leven moet Vroylick huwen durst nu boet Theert vougsaemich boven desen Hoe ghy tdlyf baldadich voed Moorghen moet ghy sober wesen
Drooghe kelen by Manieren Die zo gheerne by pyntjens poyt Souft noch hedent alfve Bieren Vry deen danders keerleken ployt Rasch om bucht Tot myn oomkens schoyt Es hu Credo huutghelesen Zwelghet tmaertsbier nu gheloyt Moorghen etc.
Die noch Rycke zyt van haven Touft nu Venus moy gheCranst Laet den theerlyngh dapper draven Huwer alder Lustich Canst Momt zynght sprynght hubbelt en danst Laet ghenouchte zyn gheResen Drynct bacxkens huut, Brast ende schranst Moorghen etc.
Fraey Joncwyfvekens ende Cnaepen Die gheerne vette morseelen smult Wilt alshedent wyde gaepen Hu buucxkens voor zes weken vult Dan natuerlicke blomme huutbult Laet hu helpen ende ghenesen Doet ghyt niet tword hu tselfs schult Moorghen etc.
Pupstekers die om den naeycoorf vechten Ende Venus zyn onderdaen Wilt den standaert vroylick Rechten En bloodshoofts noch int vleeschuus ghaen Smetst saussyskens en Coolbraen Laet nu soberheyt verknesen Drynct int Lyf den Rynsschen traen Moorghen etc.
Die om hebben doet den heesch En gheerne tlecker keelgat voert Eer ghy eit hu laetste Vleesch Laet up hu vleesch zyn ghetamboert End huwe Blende schuetel Roert Nyemandt zalmer omme vesen Hu dranck wel buetert ende poert Moorghen etc.
Oorlof pier pauwels claeys en philips End elck wie hoort ons vroylick Liedt Tes in ons buerse zeer groot Eclips Want wy en zien der een cruce Niet Nochtans al eist Dat zoo gheschiet Crancken willen wy droufheyts pesen En wesen Rechts vroylick zoomen ziet Maer moorghen willen wy wyser wesen | |
|
Dene, Eduard de (auteur),
Testament Rhetoricael van Eduard de Dene
|
1561-1562
|
Gent UB: 3330 |
f371v |
|
Komrij 1994, 949 |
|