|
|
Een nieuw Liedeken op de wijse. O triumphante vrouwe.
O God vader verheuen ghi die ons sijt genadich Hoe wort van ons bedreven Sulcken boosheyt feldadich Nochtans ghi ons beradich Bevrijt vanden vyant swaer Ende ons hier gheeft gestadich Ons daghelicx broot voorwaer Ons lichtende schoon en claer Met sonne en mane soet Hier om loeft godt mensch een paer Om sijn Elementen goet.
Hier om voor alle saken Wilt Godt/ louende wesen Sijn woort/ te recht wilt smaken Aenmerckt/ reyn wt ghelesen Sijn goetheyt groeyt ghepresen Die hy ons hier/ iont ghemeyn Den hemel/ claer midts desen Bespoeyt/ ons met dauwe reyn Die eerde/ in tswereldts pleyn Bringht vruchten voort metter spoet Hier om looft Godt/ groot en cleyn Om sijn Elementen goet.
Die Elementen schoone Godt selue obedieren Dus broeders/ dan idoone Wilt tsheeren lof vermeeren En wilt niet elders keeren Dan tot Godt sijt niet rebel Die u hier anders leeren Voorwaer sy en doen niet wel Dies doet al Christus beuel Aenmerckt/ sijn weldaden vroet Looft/ danckt godt/ en niemant el Om sijn Elementen goedt.
Hoe schoon claer/ int verchieren Sijn hier des Heeren wercken Des Elements mannieren Die sijn in alle percken Niet stil soo men mach mercken Godt subiect/ met gantscher macht Dus ghy leecke/ en clercken Slaet op Godts weldaden acht Tis voor ons dat godt oyt wracht En noch is in volder vloet Hier om/ looft godt dach en nacht Om sijn Elementen goet.
Prince. Prince wilt godt/ betrouwen Altoos/ in alle wijcken Ten sal u niet berouwen Laet liefde aen u blijcken En wilt u niet ghelijcken Den onuerstandighen quaet Maer wilt sonder beswijcken Toch volghen des Heeren raedt Merckt sijn duecht seer delicaet Die hy ons daghelijcx/ doet Hier om looft godt vroech en laet Om sijn Elementen goet.
| |
|
Deuchdelijcke Solutien, gesolveert by vele ingenieuse Componisten van diversche Cameren van Rethorijcken. Duysent guldens, zilveren coppen en schalen, Met my te coopen meucht ghy winnen: U ghelt coemt inde Lothery' sonder falen, Goede stichtinghe vindy hier binnen. Dit is u prose ende Nombre net, Wilt dit bewaren in plaetse van u billet.
|
[1575]
|
Amsterdam UB: 1998 C 11 |
fFf3r |
|
Transcriptie naar bron, diplomatisch. Door Alexandra Kecskés. |
|