|
|
? Smaendaechs
Verblijdt v lieue broeders mijn die tijt es cort het sal doch zijn Een yeghelijc die sal ontfaen sijn loen van dat hij heeft ghedaen
Met rechte so moegdi zijn verblijt in ihesum cristum talder tijt Die v die gracie heeft verleent dat ghi der werelt niet en dient [229r]
Die werelt es verganckelic haer loen es zeer seer wondelijc Wanneer haer diennaer waent ontfaen so comt die doot en sp[.]ert hem aen
Och hoe veruaerlijc es tverdriet in hem dan als hij ouer siet Dat al zijn blijscap es ghedaen ende ducht hij moet ter hellen gaen
Daer veel tormenten zij bereet hem die zijn leuen heeft gheleet Al hi beneden op eerderijc in oncuusheit houerdelijc
Och die tormenten zijn soe fel [229v] So wie daer es hij eilde wel Als ic vermoe na mijn verstaen dat hem die oot mocht commen aen
So wie daer es een ooch op slach Het dincket hem zijnde so menighen dach veel meer dan maken M jaer Dat doet die pine die helsche vaer
Och dus crijcht hij wanhoep wantrou Ende voor zijn sonden gheen berou Want hij hem niet en heeft ghedient die sijn dienaers berou verleent
Die ziele raet ihesum [230r] te dienen voor dbeste Och ghi die hier begheert af vry Te sijne int laste nu hoort na my Ic rade dat ghij de werelt vliet so en comdij in deser vreesen niet
En dient ihesum met hert met zin Hij sal v gheuen goet ghewin Dat beter sijn sal hondert vout dan ghi verdient of wensche soudt
Int tend sal hij v doen ghetrou ende voor v sonden goet berou Dan ghi die vreese [230v] met sult verslaen Wanneer sij v tont vechten aen
O dincket wat vrueghden v sal zijn Als ghi ghedient hebt v termijn Jhesus coninc der werelt wijt die v sal gheuen hemelrijc
Och daer erst al so zuet so scoen Een yeghelijc draecht dan een croon Die claerder blinket onghelijc Dan zonne sterre nv ter tijt
Der zielen brugom es soe scoon Ende sit daer inden [231r] hoochsten troon Die vrueghde es onsprekelijc Daer hij zijn dienaers mede verblijt
Dijn zoet aenscouwen es so claer wie bi hem es tien dusent jaer Het dinct hem zijnde een cleene tijt Ja hele min dan een oeghelblijc
Och die mocht hooren dat sgheluyt Dat daer een yeghelijc gheuet vut Hij soude wel liden alle pine om een huere in die vrueghde tsijn [231v]
Nu laet ons hier om roepen aen Jhesum cristum den soete naem Ende bidden dat hij ons hier verleen Hem hier te dienen sonder vlien
O ihesu heere der maeghden croon Maria vutuercooren zoon Die suuer bleef na v gheboot Van v begheeren wij tsine ghehoort
O scepper hemels ende eerterijc wij bidden v oetmoedelijc Wilt ons verleenen nu ter tijt V hier te dienen met iolijt [232r]
Ende als ons tijt hier es ghedaen So wilt ons met solaes ontfaen Bij v bouen in hemelrijc Daer vrueght ende vrede es eewelijc Amen | |
|
[handschrift zonder titel]
|
1473
|
Den Haag KB: 75 H 42 |
f228v |
|
Johan Oosterman, naar bron, diplomatisch |
|
© 2024 KNAW/Meertens Instituut