|
|
Tsdicendaechs
Aue maria maghet reyn Ghi zuuerliker zijt alleyn Onsprekelijc v zuuerheit Gaet vp der meyen dagheraet Die werels chierheit al ghemeyn [233v] En al dat in haer es bereyt In minen zin staet uwe min O zuuer maecht Mijn hert mijn zin So waer ic ben Ghi wel behaecht van v te zijn mijn ziel beclaecht
Verlanghen heeft mi om beuaen Als ic anscouwe sterre ende maen Ende voort dencke hoet met v mach staen Ghi sijt die edel zuuer bloem Daer vut ghesproten es gods soon Jhesus heere vanden hooghen troon Al hemelrijc hem zeere verblijt [234r] in v claerheyt Want ghij die zijt die men ghelijct der daghereyt met alder voghelen zanc bereyt
Onsprekelijc o edel bruut O zoete roec o zoet gheluyt Gaet bouen alle zanc en cruut Hij mach wel draghen hooghen moet Die v verkiest voor dat eertsche goet Ende altoes uwen wille doet Want hij ontfaen sal zonder waen Een brudegoems croon Die niet vergaen recht als die [234v] maen zal rayen scoon Die ghi hem edel bruut sult doen
Wat salic van v zinghen meere van allen maeghden hebdij eer van ihesu onsen lieuen heer Ghi zijt zijn moeder hij v kint Hi v vulcomelike mint Al uwe begheerte ghi voor hem vint Maria vrou hier om hij sou Die v ter tijt Mocht zijn ghetrou van allen rou worden verblijt Hier na met v in hemelrijc
O zuuer maeght verleent doch [235r] my dat ic v hier ghetrouwe mach zijn Bij wien ic ben of wie bij my wat ic anscouwe tes my al niet hoe scoent mach zijn in dit verdriet Als ic dincke dat ghij scoender zijt O lieue maeght Oft v behaeght laet my doch zijn bij v ghedaecht En niet beclaecht Maer frischs en fijn Als een brugoem in v aenschijn
O coninc in maecht dat bereyt Mijn ziele als sij van henen scheyt Moet zijn in hemel[235v]rijc gheleyt Daer alle zielen spannen croon Ende blidelike zinghen scoon met ihesum uwen lieuen zoon Diet wel besiet Tes groot verdriet van daen te zijn Daer vrueght ghesciet Ende droufheit vliet met alle pijn O maeght helpt my daer in die schijn
O vrou[.] wat salic anegaen Mijn zonden doen my dit verstaen Dat mijn ghebet wort niet ontfaen O moeder der ontfaermherticheit Al daer die sondare troest op heyt [236r] Troest my mijn zonden zijn my leyt O lieue maeght ic worde versaecht Och wat bediet Mijn herte dat claecht van nacht tot daecht Ghi antwort niet En weet hoet met my es ghesciet
Maria antwort Die zake salic v zegghen kint eer weynich hebdij my ghesijnt want ydel ghedachten v herte verblent Ic ben soe edele scoen en fijn Wie dat my mint daer willic zijn Alleen met minen [236v] kindekin Hebt my te zin Ende mijns kints min So sal v goet Ghescien van hem Ende daer ic bem Eist dat ghijt doet Suldij hier namaels draghen moet
Wilt alle ydelheit van v slaen Ghedinct mijns ende mijns kints naem So sal ic v dicke speken aen En draecht zijn liden in v hert Dat hij leet ende die groote smert Doen hij om v ghecruust werdt O hoe leet hij bij zinen tij [237r] Soe groot verdriet Lijt ghi nv vri Alleene om dy dat hij ghebiet Hier na sal v wel zijn ghesciet
Die ziele antwort marien Maria maecht ic uwen raet Met ganseliker trouwe vaet En wille ontsegghen alle quaet Gaet wech van my o ydelheit Maria heeft my waer gheseit Want ghi mijn herte dicwile verleyt So mach die bloem met haren zoon Mij spreken an [237v] En gheuen loen Een zuuer croen Als ic sal gaen van hier bij haer bouen de maen
Daer zij es roose van paradijs Scoen edel claer frisch zuet en wijs Voor alle maeghden draecht zij prijs Wie soude men vinden haer ghelijc Die god ons vader van hemelrijc Met zijnre vrucht ghebenedijt Niement voorwaer Dat es doch waer Een yeghelijc Want tes van haer Een zeker maer Ouer er[238r]terijc Dat zij es vrou van hemelijc
Waerlijc zij es die edel vrou Die men met rechte dienen zou Want sij haer dienaers es ghetrou Gheloeft des vry so wie haer dient Ende haer met rechter herte mint Sij sal hem zijn een groot vrient Haer zij lof eer met onsen heere tot alder tijt Die ons hier neer wil maken zeere In hem verblijt [....] daer na gheuen eewich rijc Amen | |
|
[handschrift zonder titel]
|
1473
|
Den Haag KB: 75 H 42 |
f233r |
|
Johan Oosterman, naar bron, diplomatisch |
|
© 2024 KNAW/Meertens Instituut