|
|
|
Tgoensdaechs [239r]
Maria conincinne
mijn troest mijn toeuerlaet
vercrijcht my v kints minne
berou voor mijn mesdaet
Die ziele
Des wordic wel ontwaren
Dat v kints minne es goet
Want sij can thert verclaren
En gheuen goeden moet
So wie yet sal beghinnen
tot zijnre lof en eer
Staet hij [...] minnen
tsal hem verdrieten zeer
Dus eist my inden zijn [239v]
Dat al mijn dienst es niet
Doe icse sonder min
Daer traecheit zeere af vliet
Hir om wilt mi ontfaermen
Maria edel vrou
Helpt mi int herte barnen
Met ihesus min en v
Och haddic my begheuen
Doen ic out was tien jaer
Int gheestelike leuen
Sijnder minnen waer ic veel naer
Nu mach ict wel beclagen
beweenen talder tijt [240r]
Dat ic aldus vele daghen
Met cleender min ben quit
Nu troest my keyserinne
Maria zuuer maecht
Sterct my met vus kints minne
Droefheit van mi veriaecht
Maria antwort der zielen
O mensche zich van binnen
Sicht stille en hoort mi aen
En scerpet uwe zinnen
So moechdij my verstaen
V claghen ende v begheeren
Die hebbic wel ghehoort
Anxt droufheit v begheeren [240v]
Daer ghij wel mi voer cort
Ic sal v minne wel beweruen
van ihesum minen soen
Int hert dracht lieuer steruen
Dan ieghen hem te doen
Wanneer ghi v cont gheuen
Daer toe met al v zin
Soe wilt in vrueghden leuen
want ghi hebt mijns kints min
Die ziele antwert maria
Och wie sal mi verleenen
Also int hert te staen
Of hoe salict verdienen
So goeden zin tontfan [241r]
Maria antwordt
O mensche waer zijn v sinnen
Hoe dwaesdi aldus zeer
Wilt doch in v bekenne
Het heeft verdient v heer
Veel meer dan ghi cont wenschen
Heft hi voor v verdient
Maria ghi sijt traghe int heisschen
Int spreken eer verleent
Ghi cont dat niet begheeren
Eist salich sal v gheschien
Maer trauwe soudt v deeren
Ten schiet v een noch gheen
Tghebet sal wel vercrighen [241v]
Dat ghi doet mijns kints eer
Mach twifel buten bliuen
Dat hindert v so zeer
V bidden ende v begheeren
Laet vlieghen van v snel
Maect anxt wanhoep gheweeren
Wantsij doen v groot quel
Waer om so wildij troeren
Ende v verslaen dus zeer
Had god v niet vercoren
Ghi en waert hier nemmermeer
Ghij moghet in v herte
Troren voer v mesdaet
Maer dinct dat mijn kints smerte [242r]
Noch veel te bouen gaet
Tien dusent jaer beneden
Gheleeft zeer stranghelijc
En heeft bouen gheen reden
Te sijn een oegheblijc
Want beter es tuerclaren
Mijns kints een oeghopslach
Dan in tiendusent jaren
Yemant verdienen mach
Maer die troert voor zijn sonden
Zo lang hem duert aertrijc
Ende hoept op mijns kints wonden
verdriet zijn eewich rijck
Doet zo en west te vreden [242v]
Wilt v niet zeere verslaen
Dinct wat hi heeft gheleden
Al hebdi veel mesdaen
Een druepel van zinen bloede
Es weerdich doch alleen
Te nemene vut aermoeden
Die werelt al ghemeen
Nochtan heeft hijt algader
Ghescort voer v mesdaet
En paeys tusschen zijn vader
Ent v zeere wel ghemaect
Hier in wilt v verbliden
En dient hem trouwelijc
Hi zal in corten tijden [243r]
V halen in zijn rijc
Die ziele danct marien
Lof eer sij v marie
Der coen edel zuuer maecht
Ten was noch waerheit nie
Dat ghij my liet versaecht
Amen | |
|
|
[handschrift zonder titel]
|
|
1473
|
| Den Haag KB: 75 H 42 |
| f238v |
|
| Johan Oosterman, naar bron, diplomatisch |
|
© 2024 KNAW/Meertens Instituut
