Home     Grasduinen     Over     Zoektips     FAQs     Disclaimer     Meertens Instituut         english

Nederlandse Liederenbank


Donderdach

Hij trore die troren wille
Mijn troeren es ghedaen [244r]
Ic hebbe ghesweghen stille
Maria wel verstaen

Waer omme so willic troeren
Of sorghen alte zeer
Ic weet ic bem vercoren
Van ihesum minen heer

Dat ic hem bem vercoren
Heeft hi ghedaen aenschijn
Want ic moest zijn verloren
En da zijn doot en zijn pijn

Hij es hier neer ghecommen
Daer in bem ic verblijdt
Mesdaet sou my verdoemen
Sijn doot heeft mi ghequit [244v]

Dus willic mi verblijden
Seer vromelijc in hem
Draghen tot allen tijden
Sijn doet in minen zin

Des ben ic wel ontwaren
Daet zine pinen en sijn doot
Al badic dusent jaren
Tware al verloren goet

Hier om willic hem minnen
Die my dus heeft verloost
Ende in mijn herte binnen
Houden voor al mijn troest

Lof eer danc sij marien [245r]
Die edel zuuer maecht
Ten was noch waerlic nye
dat sij my liet versaecht
Amen
Hij troere die troeren etcetera

[handschrift zonder titel]
1473
Den Haag KB: 75 H 42
f243v

Johan Oosterman, naar bron, diplomatisch