|
|
|
R Kinder nv loeft die maecht marie
Si heeft vervult die prophecie
Si droech een kint die maecht marie
Dat wonder en gesciet nie.
Maria es eene sterre scone.
Die ons verlicht aenden trone.
Wie haer aenbeet hi heeft te lone
Ihesus christus marien sone.
Kinder.
Maria es eene dageraert.
Die vor der middernacht op staet.
Wie haer aenbeedt hi heeft aflaet.
Van alder sunderliker daet.
Kinder.
Maria es eene triniteyt.
Moeder van alder ontfermicheyt.
Si es soe vol alder heilicheyt.
Dats ons een groote salicheyt.
Kinder.
Maria es eene volle vloet.
Daer god aen nam vleesch ende bloet
Dat sal den genen wesen goet
Die dienen om dat eewege goet.
Kinder.
Maria es eene rose sonder doren
Die god tot eender moeder heeft vercoren
Eer ihesus christus was geboren.
Was dese werelt al verloren.
Kinder.
Her ioseph viel neder op sijn knien
Hine conste dat wonder niet aensien
Dat kint dat inde crebbe lach.
Hi wiste wel dat die gods sone was
Kinder.
Die ingelen die saten daer alle bi
Met grooter vrouden wiechden si
Met wonder waren si beuaen.
Dat haren scepper soe was gedaen
Kinder.
Die ingelen songen alle sanctus
Die heilege geest es hier int huys
Geboren van eender ionger maecht
Die onsen vader soe wel behaecht
Kinder.
Sijt willecome her iongelinc.
Die ons van bouen es gesint.
Der reynder maget marien kint.
Ende alder yngelen coninc.
R Kinder nv loeft die maecht marie
Si heeft veruult die prophecie.
Si droech een kint die maecht marie
Dat wonder en gesciede nie. | |
|
|
Liedboek van Lijsbet Ghoeyvaers
|
|
[1500 ca.]
|
| Parijs, Bibliothèque Nationale, Néerl. 39 |
| f16r |
|
| Transcriptie door Dirk Geiernaert, naar Van Seggelen 1966. |
|
