Home     Grasduinen     Over     Zoektips     FAQs     Disclaimer     Meertens Instituut         english

Nederlandse Liederenbank


Op wie wilt horen singen van enen tymmerman
De sancta maria virgine.

Wi wilt horen singen
Van enen leeu seer gram
Hoe die maget maria
Aen sine minne quam

Dat vernam een bode
Die engel gabriel
Hy was gesonden van gode
Al toe der maget snel.

God gruet v vol genaden
Sprac hy ter maget fijn
Die heere is vanden troone
Wilt sijn v kindekijn

Ghy droecht negen maenden
Der engelen coninc
Van v soe was geboren
Ihesus de iongelinc

Ghy leit dat kindeken cleyne
Al in een crebbekijn
Al voer twee stomme beesten
Die ewege sone fijn

Hoe wel was v te moede
O moeder ende maget fijn
Doen v dat kindeken cleyne
Boet sijn root mundekijn

Ghy moest van vrouden beuen
Dat es wel openbaer
Doen op v sloech sijn ogen
Die ewige godheit claer

Ghy naempten in uwen arme
Ende gaeft hem in uwen scoot
V meechdelike borste
Al in sijn mundeken root

Sijn bruyn oegxken scone
Sloech hy in sijn aenschijn
Hy was v eygen sone
Die ewige godheit fijn

Als ghy den kindeken cleyne
O moeder wel gedaen
Met uwen handen reyne
Sijn voetken wil gaen dwaen

Verleent my scone vrouwe
Die ogen alsoe nat
Dat ic met minen tranen
Bereiden mach dat bat

Als ghijt heft uten bade
Dat proper kindeken cleyn
Wilt hem van mijnder herten
Maken een beddeken reyn

Liedboek van Lijsbet Ghoeyvaers
[1500 ca.]
Parijs, Biblioth?que Nationale, N?erl. 39
f61v

Transcriptie door Dirk Geiernaert, naar Van Seggelen 1966.