|
|
Mijn hertz is ervullet mit vrolicheit van vreuden moiss ich syngen Vnss ist vpgegangen dat licht der selicheit Laist vns mit suyssen stymmen clyngen Laist vnss suyssen sanck anheuen want vns ist gegeuen gar wieder dat ewige leuen [142v] durch marien der vil reynen juncffrauwen
Vss dauidtes stamme is vpgegangen eyn blomechijn der reynicheit van schoenden groiss mit suyssen roech vmbfangen maria eyn fonteyn der suyssicheit vnss ist in ir wal erlungen In den hymmel ist ir ruch gedrungen Ind hait zo sich gargedwungen den oeuersten konynck in guoeder trouwen
Maria du bist dat vill lustliche preill van allen suyssen bloemen ind kruden der heilgen drieuoldicheit alleyn geworden zo deil geplantzet gesteuelt in dat suden vss dir ist vnss zo troiste gewassen sonder allen mynschen saissen bouen all natuyrlicher maissen eyn violier der vrolicheit
O edel iunffrauwe we wal was dir zo mode do ihesus in dymne schoisse lach dijn leue kyndelijn in dynre moderlicher hoede Ind dich gar vruntlichen an sach Ind viss dynen burstelijn soich dat vil reyne mylchelijn Ind he wieder [143r] in dyn hertzelijn goiss syn gotliche suyssicheit
Du bist des vill wijsen salomonis throin van alre tzijrait wal bereit van cypressen der heilicheit ussgesneden seir schoen mit dem golde der mynnen vmbkleid vndersat mit elpenbeynen mit edelen kostlen steynen mit allen duchden groiss ind kleynen gar wunderlichen gewracht
In diesen vill schoenen throen hait gesessen der oeuerste konynck gotz son alweldich In synre gotheit vnbegrijfflich vngemessen He hait van ir gar mynnentlich angenoemen de mynsliche natuyr van allen sunden reyn ind puyr he hait vnssgegulden garduyr mit synes bitteren doides dracht
Maria du vil werdige konyncgynne dis hymmelrichs ind ouch der eirden sijs vns eyn vnderstant dar zo eyn guyt begyn dat wir selich moigen werden als wir sullen varen van hynne so verlucht vns vnsse syne van buyssen ind ouch van bynnen zo schouwen de heilge dryualdicheit
O oeuerste konynck van hymmelrich cristus ihesus [143v] vnss verloiser ind here durch dinen bitteren doit biden wir dich ynnentlich hilff vns durch dynre moder ere dat wir werden vrij van sunden van den helschen hunden In vnss ellendigen doitz stunden breng vns in de ewige selicheit Amen
| |
|
[handschrift zonder titel]
|
2e helft 15e eeuw
|
Trier, Stadtbibliothek, 516/1595 |
f142r |
|
Afschrift Johan Oosterman |
|
© 2024 KNAW/Meertens Instituut