|
|
|
Den iiij. Psalm Ducis Albani,
op de wijse vanden ix. Psalm. Heer ick wil u uut sherten gront.
Ke Marvillie, Ke Diablos,
Moet ick nu te voet end te Ros
Wijcken van Alckmaer cleyn van waerden,
So werd ick niet gheacht op Aerden.
Renego Dios, is dat waer,
Dat mijn Wissel int openbaer,
Uut Spaengien te ruggh is ghesonden,
Dit gheeft my thert veel sware wonden.
Sal ick nu door ghebreck van ghelt,
Ruymen moeten al uut dat Velt?
Sal ick moeten Banckerotteeren,
Na Spaengien schampen met oneeren.
Ben ick dan niet op een Vleesbanck,
Sonder ghelt is mijn macht heel cranck
Inden strick ben ick dan ghevanghen,
Daer meed ick ander meynd te hanghen.
Heylighe Vader, bon Compagnoen,
Wat sal ick dese Geusen doen
Want het gaet my teghen mijn gissen,
Ick vrees, ick sal tLandt moeten missen.
Bijtschapen, Prelaten, coemt voort,
Papen, Knuncken, sendt ghelt aen boort,
Laet u Hoeren wat abstineeren
En wilt het ghelt tot my waert keeren.
Vargas, del Regio mijn Bloetraet,
Vitelle zijt mijn toeverlaet,
Is nu u Raet gantslick verlooren,
So sullen wy hier moeten smooren.
Ghy Spaenschen Adel met u pracht,
Ick heb u tot veel Staets ghebracht:
Uut den dreck heb ick u verheven,
Weet ghy my nu gheen troost te gheven.
Ghy Oostersche Canonicken vry,
Adiaphoristen staet my by:
Hertoch Eerick met u ghesellen,
Hertoch Oleff wilt Vendel vellen.
Maghercool ghy die placht int Velt
Den Duyvel te dienen om ghelt,
Schouwenburch brocht Sneecken by hoopen,
Nu tghelt op is, nu gaense loopen.
Een troost is voor my noch int lest,
Die Spaensche Santen helpen best,
Die wil ick dienen tallen daghen,,
Sy helpen my van alle plaghen.
Señora de Valledolijt,
Maect my doch dese Geusen quijt,
Señora de Milagres coene,
Want sy maken my veel te doene.
Señora de Mocerat milt,
Een Hellem met een gulden Schilt
Meucht ghy te danck van my verwerven,
Laet my in Spaengien rustich sterven.
Prinslicke Ridder Sanct Jago,
Señora de Sanct Telemo,
U beveel ick Lijf end Siel tsamen,
Alle Catholijcken spreect, Amen.
Liefde vermacht al: fecit. Anno den Decembris. |
|
|
Een nieu Guese Liede Boecxken/ Waerinne begrepen is den gantschen Handel der Nederlantscher gheschiedenissen/ dees voorleden acht Jaren tot die Peys toegedraghen/ eensdeels in Druck wtghegaen/ eensdeels nu nieu by gheuoecht. Midtsgaders sommige schoone Refereynen ten seluen Propooste dienenden hier achter by ghestelt. Nieu [!] nieulick vermeerdert ende ghecorrigeert [hsn. 'Viue le Gues'] Pro Lege, Rege. [pagina ontbreekt verder]
|
|
1576?]
|
| Göttingen NSUB: 8 H Holl II 2551 RARA |
| f4v |
|
| DBNL, naar Kuiper & Leendertz 1924. |
|
