|
|
|
Een liedeken
op de wijse, de Boer met groot gewelt, al uut de Camer spranck.
Ofter yemant vraechde, hoe ick ben befaemt,
Der Papen claghe, benick ghenaemt.
Hoe seer sietmen nu dalen
Ons Pauselick Roomsche Rijck,
Bisschoppen en Cardinalen,
Papen en Monicken alle ghelijck,
Wy vallen tot den ooren int slijck,
Wie sal ons weder oprechten?
Want onse knechten nu nemen den wijck.
Des moghen wy wel crijten,
Suchten ende claghen seer,
Ons Kerck met haer profijten
Willen sy nu trecken ter neer,
Sy vallen vast aen, hoe langer hoe meer,
Die nu de Nappen draghen
Sonder vertraghen, trecken om seer.
Aen onse heylighe Santen
Sy als nu de handen slaen,
End achtense als onnutte Planten,
Die langh gheen Mirakel hebben gedaen,
Dus moeten sy nu te water gaen,
Sy willense oock wel vieren,
En vercieren, met roode Tabbaerden aen.
Wonder sietmen bedrijven
Van de Geusen seer menichfout,
Sy willen ons verdrijven
Uit onse Clooster lustich ghebout,
Och als sy aldus hebben ghebrout,
Waer willen wy dan loopen?
Spaceren met hoopen, int groene Wout.
De ghestichten ende wercken
Van onsen Vader den Heylighen Helt,
Sijn nu in alle Kercken
Meest al te samen qualick ghestelt:
Ons Misse heeft haer te bedde ghevelt,
Sy soeckt veel Medecijnen
Sy wil verdwijnen, in ghebreck van ghelt.
Sy zijn in groot benouwen,
Ons Aflaten al inder kist,
Om dat sy niet moghen aenschouwen
Het Vaghevyer dat ons seer mist,
Ratten en Muysen hebbent uutghepist,
Sijn dit niet groote plaghen
By vlaghen, bedrijvense sulcken list.
Hoe haest sietmen verkeeren,
In corten tijen, so men mach sien,
Om datmen ons niet meer wil eeren,
Stuypen, nijghen, en buyghen de knien,
De Biecht is doof gheworden by dien,
Sy en can niet meer gheweten
De secreten, al van de Lien.
Princelicke vader ghepresen
Gheresen, te Roome groot,
Wilt onse Voorstander wesen
In desen, want nu wil treffen de cloot:
Uwen schat wilt nu ontdecken bloot,
Ende wilt hem lustich uuten
End ontsluyten, want het is noot. |
|
|
Een nieu Guese Liede Boecxken/ Waerinne begrepen is den gantschen Handel der Nederlantscher gheschiedenissen/ dees voorleden acht Jaren tot die Peys toegedraghen/ eensdeels in Druck wtghegaen/ eensdeels nu nieu by gheuoecht. Midtsgaders sommige schoone Refereynen ten seluen Propooste dienenden hier achter by ghestelt. Nieu [!] nieulick vermeerdert ende ghecorrigeert [hsn. 'Viue le Gues'] Pro Lege, Rege. [pagina ontbreekt verder]
|
|
1576?]
|
| Göttingen NSUB: 8 H Holl II 2551 RARA |
| f9r |
|
| DBNL, naar Kuiper & Leendertz 1924. |
|
