|
|
|
Een ander liedeken van den Briel,
Op de wijse: Ick roep u Hemelsche Vader aen, &c.
Wie wil hooren een nieu ghesanck,
Wat nieus sal ick aenheven,
Hoe dat de Geusen namen haren ganck,
Uut Enghelant met haren danck,
En hadden in haer bevanck,
Haren Admirael verheven.
Dat was den hooch loffelijcken Heer
Van Lume ghehieten,
Met hem dat hy hadde noch meer,
Torlom, vernaemt veer,
Na de Hollanders haer voechden seer,,
Sy dapper daer na stieten.
Het gheschiede op eenen Palmdach
Smorghens omtrent acht uyren,
Dat sy aenvielen met groot ghewach,
Die vloot al sonder verdrach
T'gheschut als een donderslach
Men aen beyde zijden mocht hooren.
Daer quam uyt Spangien met de vloot
Een Buys daer sy na loerden,
Die sy met menighen schoot
In namen met harden stoot.
Twee kisten met gelde groot,
En Specery sy daer uyt voerden.
Op eenen Dincxdach traden aent lant
Al de Soldaten en Capiteynen,
Daer sachmen menighen fraeyen quant
Uuten Briel sy schoten te hant,
Sy meendense te keeren, want,
Met vliegende Vaendels sy aen quamen.
Met een Trompet al sonder getreur,
Sachmen Torlon gaen treden,
Ende hy quam ten Briele veur
Hy seyde: doet op de deur:
Want alle u vesten en muer
Condt ghy voor ons niet houden.
Van weghen den hooch gheboren Heer
Van Orangien ghepresen,
Gaf hy haer beraet een ure of meer
Sy gaven geen antwoort weer
Lume die haesten hem seer
Met sijn hoopen uyt ghelesen.
Twee tonnen vol met Buscruyt ghelaen
Voor de poorte ginghen sy legghen,
Die sachmen hen daer steken aen
Die poorte brande saen,
Goetwillich de Borghers op daen
Dander poort, sonder weersegghen.
Alsmen schreef twee-entseventich jaer
Den eersten Aprilis tot desen
So namen sy in, en dat is waer,
Den Briel al sonder vaer
Terstont sy ginghen maken claer,
Melis Tempel ghepresen.
Ghelijck als men leest in Samuel,
Door de Arcke sijn ghebroken
Alle de Afgoden also snel,
De Schaker en sijn ghesel,
En metten groeten Bel,,
Een vyer ginghen sy stoken.
Ducdalve mocht verdraghen niet,
Den Bril op sijnen Neuse,
Uut Uutrecht hy daerom trecken hiet,
Hoort al na mijn bediet,
Thien Vaendels Spangiaerts siet,
Om te verstooren die Geusen.
Niet wel waren die Spangiaerts ghemoet
En Bossu bloetgierich bevonden,
Sy traden in sommighe schepen onsoet
Ende meenden verwoet
Te wasschen haer handen int bloet
Die sy inden Briel vonden.
Seer dapper jaechden die Geusen haer,
Aenden gront die Spangiaerts setten
Haer Schepen, dat is openbaer,
Door die Kley met grooter vaer
Haer Vendels sy sleypten naer,
Nae Dort wilt hier op letten.
Die Spangiaerts met dreck belaen,
Voor Dort sy deerlijck stonden,
En meenden in te raken also saen
Maer sy moesten daer buyten staen,
Die Borghers lietense niet ingaen,
Hoort al nae mijn vermonden.
De Spangiaert quam voor Rotterdam,
Sy vonden die Poorten ghesloten,
Met verraderye also gram,
Die Spaengiaert inne nam,
Met ghedruys daer inne quam,
Dat den Borgher heeft verdrooten.
Wel twee hondert daer bleven doot,
Die de Spangiaerts daer doorstaken,
Noyt Borgher was in meerder noot,
Ghekrijs was daer seer groot,
En de straten van bloede root,
Als Harinck sachmense kaken.
Alle ghy steden cleyn en groot,
Wilt hier doch wel op mercken,
Laet u dit wesen in der noot,
Een exempel end spieghel bloot,
Hout u vast totter doot,
Voor die sulck boosheyt wercken.
Die van Vlissinghen ghemeyn,
En gheheel Walcheren machtich,
Met haer trocken eenen lijn,
Die van der Veere fijn
Met de Boeren sy eens zijn,
Middelburch sy dwinghen crachtich.
Den Alvens Rijcke heeft een ent,
In dat Zeelandt vercooren,
Sijne Zeevaerdt is gheschent,
Want die Wielinghe also jent,
End de Mase exellent,
Die heeft hy nu verlooren.
Lof Prince onse God altijt,
Wilt verlossen tot desen,
Die om de waerheyt zijn benijt,
End u soecken met herten vlijt
Oock die voor den uwen strijt,
Wilt die behulpich wesen. |
|
|
Een nieu Guese Liede Boecxken/ Waerinne begrepen is den gantschen Handel der Nederlantscher gheschiedenissen/ dees voorleden acht Jaren tot die Peys toegedraghen/ eensdeels in Druck wtghegaen/ eensdeels nu nieu by gheuoecht. Midtsgaders sommige schoone Refereynen ten seluen Propooste dienenden hier achter by ghestelt. Nieu [!] nieulick vermeerdert ende ghecorrigeert [hsn. 'Viue le Gues'] Pro Lege, Rege. [pagina ontbreekt verder]
|
|
1576?]
|
| Göttingen NSUB: 8 H Holl II 2551 RARA |
| f46v |
|
| DBNL, naar Kuiper & Leendertz 1924. |
|
