|
|
|
Van don Frederico synen soon.
Op de wijse: Rijck Godt wie sal ick claghen, etc.
Eylacen ick mach wel claghen,
Tot u O mijn Oude Vaer,
Hoe sal ick moghen verdraghen
Dit bitter lijden swaer,
Met beven ende schromen
Claghe ick u mijn verdriet,
Dat ick in Hollant ben ghecomen,
Godt verderf hem diet my riet.
Dit derf ick niemandt wijten,
Dan u Stede van Amsterdam,
Ghy dedet niet dan roepen ende crijten,
Tot dat ick in Hollant quam:
Daer op soo quam ick loeren,
Op u belofte certeyn,
Ten was niet dan der Geusen voeren,
Soo ghy seyt, haer macht was cleyn.
Ick betroude dat door raet der Papen,
Dat is my nu misluckt,
Dat bedde daer ick meende te slapen,
Dat is my nu ontruckt,
Van Rammekens moest ick ruymen,
Dat maect my therte seer bang,
Termuyen meenden wy te sluymen,
Maer waren daer oock veel te lang.
Mijn beloften achten sy cleyn van waerden,
Mijn boosheyt een yeghelick ruyckt,
Die ick al binnen Naerden,
En te Haerlem heb ghebruyckt:
Daerom sy malcander sweeren,
En doen my wederstoot:
Sy spreken: Laet ons dapperlick weeren,
Wy en moghen niet quader als doot.
Ist dat ick uut Hollant moet wijcken,
En Zeelant met schanden verlaet,
Soo sullen my de Lieden na kijcken,
Waer ick gae by der straet,
Een yeghelijck sal segghen:
Daer gaet Duckdalven soon,
Die Hollant moeste laten legghen,
Sulck schempen ben ick niet ghewoon.
O Stadt ghy moecht wel beven,
Die daer leyt aen de Watercant,
Wanneer ick Hollant moet begheven,
Soo coem ick u ter handt,
Ick sal u plonderen ende rooven
U Kisten ende Cantooren schoon,
Ghy mocht my wel ghelooven,
Want het is u verdienden loon.
De Landen te verderven
Daer toe zijt ghy ghesint,
Dat soude moeten besterven
Dat alder jongste kint:
Maer Godt sal niet ghelijden
Soo grouwelicken Moort,
Sy sullen haer noch verblijden,
Als ghy sult wesen verstoort.
Ghy Steden onghewonnen
Blijft vroom tot deser tijt,
Diet quaet aen u begonnen
Die zijn haer macht meest quijt,
Dus wilt Godt dancken en loven,
Hy maeckt u cloeck en stout,
Die cracht coemt u van boven,
Dat ghy u soo vromelick houdt.
Oorlof ghy Borghers allen.
U Steden doch wel bewaert,
Ghelooft nu gheen schoon kallen
Al van den Spaenschen aert,
Die wreede macht uut Spaengien
Wilt stellen achter de handt,
Dat de loffelicke Prins van Oraengien
Mach regeren zijn eyghen Vaders Landt. |
|
|
Een nieu Guese Liede Boecxken/ Waerinne begrepen is den gantschen Handel der Nederlantscher gheschiedenissen/ dees voorleden acht Jaren tot die Peys toegedraghen/ eensdeels in Druck wtghegaen/ eensdeels nu nieu by gheuoecht. Midtsgaders sommige schoone Refereynen ten seluen Propooste dienenden hier achter by ghestelt. Nieu [!] nieulick vermeerdert ende ghecorrigeert [hsn. 'Viue le Gues'] Pro Lege, Rege. [pagina ontbreekt verder]
|
|
1576?]
|
| Göttingen NSUB: 8 H Holl II 2551 RARA |
| f69r |
|
| DBNL, naar Kuiper & Leendertz 1924. |
|
