|
|
|
Hier na volgen de voornaemste Feyten, die onder den nieuwen
Governeur Don Loys de Requesens geschiet zijn. Ende ten eersten
vanden Slach voor Berghen op Zoom, gheschiet den xxviij. Januarij.
Op de wijse, Jonck dom herteken wat cont ghy maken etc.
Wilt met Processie nu al te samen
Uwen nieuwen Gouverneur vermaert,
Groot Commandeur van Castilien met namen
Inhalen met synen hoop vergaert.
In Antwerpen is hy gecomen druypen
Als een Haen die vanden reghen is nat,
Die Burgers gingen te samen sluypen,
Vragende wat mocht beduyden dat?
Den lesten Januarij voorleden,
Is de tijding gecomen int openbaer,
Tot Antwerpen al binnen der Steden,
Hoe dat die slach met haer verloren waer.
Te Loddijcks hoeck by Berghen sy laghen
Aen haren Anckeren, die Papouwen snel
Die Geuskens quamen haer verjaghen,
Aen boort clampten sy haer wel.
Tgrof gheschut aen allen zijden
Ginck daer af als een donderslach,
De Roers die knapten te dien tijden,
Twelck velen was een hardt gelach.
Die Schepen onder den anderen dreven,
Die Geuskens leyden al aen boort:
Papouwen te vluchten men sach aenheven,
Tot onder Berghen seer verstoort.
In grooter noot sy lieten steken
Thien van haer beste Schepen vaeliant,
Alsoot daer clarelick is gebleken,
Catte noch Hont quammer van te Lant.
Spaeniaerts, Walen, Italianen mede,
Menighen roep men hoorde daer:
Misericordia roepen, dat was haer zede,
Maer gheen ghenade en was aldaer.
By de twee duysent zijnder ghebleven,
Van die Papouwen, en dat is waer:
En op de Schepen die na Berghen dreven
Wasser seer vele ghewont aldaer.
De Gouverneur van Vlissingen moedich,
Monsuer Boisiot gheheeten is,
Sijn broeder was Ammirael hoochmoedich
Die volbracht heeft dit Feyt ghewis.
Papisten wilt doch eens overdencken,
Dat Godt de Heer boven u regeert:
Daer hy mede is, mach niemant krencken,
Twelck die Schriftuere ons oock wel leert.
Al binnen Vlissinghen soet uutvercoren,
Daer worden op een tijt binnen ghebracht,
Vier Schepen van de Papisten verloren,
Welck waren die principaelste van macht.
Die ander vijve die sachmen blijven
Ter Vere binnen met groot gheluyt,
Twas al verblijt, Mannen ende Wijven,
Al van die groote schoone Buyt.
Met negentien Schepen sy volbrachten
Desen Tocht, teghen den vyant verwoet,
Welcke Victorie groot is te achten,
Die ons ghegheven heeft de Heer seer soet.
Laet ons den Heere dancken en loven
Voor zijn groote ghenaden niet cleyn,
En groot maken onsen Godt hier boven,
Met Lofsanghen ende Psalmen reyn. |
|
|
Een nieu Guese Liede Boecxken/ Waerinne begrepen is den gantschen Handel der Nederlantscher gheschiedenissen/ dees voorleden acht Jaren tot die Peys toegedraghen/ eensdeels in Druck wtghegaen/ eensdeels nu nieu by gheuoecht. Midtsgaders sommige schoone Refereynen ten seluen Propooste dienenden hier achter by ghestelt. Nieu [!] nieulick vermeerdert ende ghecorrigeert [hsn. 'Viue le Gues'] Pro Lege, Rege. [pagina ontbreekt verder]
|
|
1576?]
|
| Göttingen NSUB: 8 H Holl II 2551 RARA |
| f73r |
|
| DBNL, naar Kuiper & Leendertz 1924. |
|
