|
|
Een nieu liedeken op de wyse Laest ginck ick inde mey spanceren
Schoon jonckheerken heusch en trouwe Deesen beeker compt tot dy Ick wachts wel eedel schoon jonckvrouwe Waer daer maer v vrientschap by Schoon jonckheer hoe meendy dat Maer dat ick v lieuer hadt Dan de wyn / tmocht so zyn Tsou v rouwe Nemmermeer o liefste myn
Jonckman ghy syt wel ter taelen Maer v hert is veel te loos Schoon jonckfrou ten kan niet faelen Thert leyt op de tongh altoos Ghy vryt wel maer meent het niet Schoon jonckvrou dat waer my leet Wie ist greyn / ghy alleyn Wilt niet dwaelen Dat en hoop ick niet serteyn
Ofmen v in eerbaerheeden1 Eenighe courtosye dee All myn tyt sou ick besteeden Off ghy oock mocht volghen mee Maer ghy soudt v roemen seer Dat en doe ick nimmermeer T'wert ghedaen / vanden quaen Sonder reeden Siet my toch daer niet voor aen
Prinse wilt deesen croes aenvaeten En die dochters geuen prys Lieff ick danck v bouen maeten En sal volghen v adtvys Neempt dit aen en blyft gesont Troost my lieff ick ben doorwont Tis gheen noot och tis groot Wat cant baeten Een cusken voor v mondekyn root | |
|
Album amicorum van Aefgen Claesdochter van Giblant
|
1598-1600
|
Den Haag KB: 135 K 36 |
f11v |
|
Willem Kuiper, naar bron, diplomatisch. |
|
© 2024 KNAW/Meertens Instituut