|
|
Een nieu liedeken op de wyse Ick claech v venus dieren
Wel op ghy jonghe sinnen die nu in weelden syt dient vry bachus wt minnen in desen soeten tyt met venus v verblyt te eeten en te bicken ceres sal met jolyt v iongher hert verquicken
In een foreest wilt comen met v lieff excelent middel die donckere bomen sy staen seer dicht geprent een croesken men v sent daer eens is wt gedroncken van een princesken jent t was wt liefde geschoncken
Wat can dit toch al schelen als men int schat deuyn een liedeken gaet quelen met v lieff halenwyn ghy eedele borsten fyn hoort wat ick v ontfouwe ter feest so sult ghy syn opt appelken van gouwe
Met paenderen wilt draeghen t suycker op v bancket so hout toch des nyders plaegen so blyft ghy onbesmet een geltsacxken seer net dat sou ons wel gelycken want wy panneken vet speelen sonder beswycken
Sonder verschiet van ballen ist quaet coluen te gaen en wilt niemant becallen v ryck sal niet langh staen [l]eent op geen idele waen we[r]t om v lieff een rouer die waeghen compt hier aen wy moeten daer me ouer
Met berkenroetghens aerdich iaechmen die paerden voort ons cappetyen is vaerdich den trompet wert gehoort elck toch vreucht oorboort en laet die valcxkens vlieghen nae cortisaenen spoort en wilt niemant bedrieghen
Tis hoe langher hoe wilder want wy rysen geneucht syt ghy een aerdich schilder met flora v verheucht bemint altyt die deucht en oock goude ryalen bant van v so ghy meucht die op ons soetheyt smaelen
Ghy princen wilt myn praeten toch wel verstaen int goet geexcusaert wilt laeten die dit wt ionsten doet swart leyt onder die voet van godt den heer geslaeghen v lust sal syn geboet eert ghy godt al v daeghen | |
|
Album amicorum van Aefgen Claesdochter van Giblant
|
1598-1600
|
Den Haag KB: 135 K 36 |
f15v |
|
Willem Kuiper, naar bron, diplomatisch. |
|
© 2024 KNAW/Meertens Instituut