|
|
|
EEN LIEDT OP DE WYSE
VENUS DER MINNE
GODDINNE
Als ick moet scheyden certeyne
van v schoon maechdeken reyne
soo sal ick noch dickmaels weyne
om v alleyne
Edel is die schone carsouwe
hy spant oock die croone der vrouwen
op haer staet sonder flouwen
al myn betrouwen
Fraey edel is hy van manieren
en oock seer lieffelyck int bestieren
troost my dat bidick v fiere
o schoon rogiere
Men sach noecht schoonder figuyre
noch amoireuser creature
dan dit beeldeken pure
teeniger vre
Eerlyck is die lieffde gepresen
en oock van schoonheyt vyt gelesen
onder duysent int wesen
noyt schoonder verresen
Niet sonder haer mach myn genoegen
noch gout noch siluer schoon in doogen
al quaemt als pylen wt bogen
my toegevlogen
Sal ick geenen troost verweruen
soo moet ick om v liefken sterven
en van v schoonheyt niet eruen
dats myn bederuen
Als ick aensie v eerbaer leeuen
t'geen in myn herte staet geschreuen
soo moet ick in vreuchden leeuen
vry sonder sneuen
Het is groote pyn en verdriet
die hen van syn lieff verlaeten siet
maer wel mach hy hem verblyden
die se mach spreeken sonder myden
PRINCE
Schoon princes liefken vyt vercoren
en laet v liefken niet verlooren
soo sal ick noch vreucht oorboren
en druck versmoren
P C Ruichauer A C | |
|
|
Album amicorum van Aefgen Claesdochter van Giblant
|
|
1598-1600
|
| Den Haag KB: 135 K 36 |
| f20r |
|
| Willem Kuiper, naar bron, diplomatisch. |
|
© 2024 KNAW/Meertens Instituut
