Dutch Song Database

Een nieu liet op die wyse gelyck als die witte swaene Hoort ghy dochters en gesellen Wie ghy syt ionck ofte out Die v tot vryen gaet stellen En so gaeren waert gehout En stelt v hert niet also seer Na gelt en goet Maer voor al soeckt deucht en eere Wat ghy doet Gelt en goet sietmen nu vryen Voor waer meer als den persoon Eer en duecht steltmen besyden Die gelt heeft die spant die croon Die nu tmeeste heeft om te b[ye]den Met bewys Die sietmen alle daech geschyen Eer en prys Compt daer een jonckman ter baene Die hem wat tot vryen stelt T eerst datmen na hoort vermaenen Of hy heeft middel van gelt Ten baet gheen liefde noch goetwille Lettet hem aent best Hy crycht terstont syn apostelle nihile opt request Maer compt daer een ingetreden Die gelt heeft in syn comtoor Die contant heeft te besteden Terstont crycht hy goet ghehoor Tis dan al met stuypen en nyghen Compt in monsieur Hy sal terstont die dochter cryghen Door tgelts faueur Gelt en goet sietmen nu vryen Bouen eer en goede faem Ouerdaet steltmen ter syen Die gelt heeft is aengenaem Tis alleens van wat religie Hoemen is gesint Die van gelt heeft die beste prouisie Wert bemint Eertyts hadmen goet behaeghen In eer deucht en een goet geslacht Daer hoertmen niet meer na vraghen Die gelt heeft die is geacht Al had een jonckman goe forency Wyscheyt en verstant Hy creech voorwaer gheen audiency Heeft hy gheen contant Giericheyt boos van naeture Wat hebt ghy al quaets gebaert Dat daer so menich goe perture Blyft gescheyden en ongepaert En dat al om een cleyn verschille Een hant vol gout Blyuen daer veel teghen haer wille Ongetrout Men placht oock voren te spreken Dat het liefde al vermocht Maer nu vintmen vreemde treecken Dat liefde wert om gelt vercocht Men mach nu oock niet meer singhen Dat liefde verwint Want het gelt doet wonder dinghen En maeckt liefde blint Orloff dochters en gesellen Wie ghy syt arm ofte ryck die v tot vryen gaet stellen Siet altyt na ws gelyck En stelt v hert niet also seer Na gelt oft goet Maer voor al soeckt deucht en eere Wat ghy doet Album amicorum van Aefgen Claesdochter van Giblant 1598-1600 Den Haag KB: 135 K 36 f21r Willem Kuiper, naar bron, diplomatisch.

© 2024 KNAW/Meertens Instituut