|
|
Op de wise La douce face
Qualick lieff kan ick v houwen Voor loyael in deese scyn Want ick heb so cleen vertrouwen Op v liefde teegens myn Sorch door aenmercken Dat ghy nyders wercken Te veel ghelove gheeft Die my ontstercken Al hier in dese percken Waer door myn jonckheit beeft
H]oe s[ow] my thert niet breecken Want ghy meer tgheloue gheeft Nyders clap en quaet spreeken Dan my die v bemint heeft In deucht en eeren Gaet ghy [nu] separreren En kiest voor hem een aer Wat kan ickt keeren Ick soudt v wel begeren Begerde ghy my maer
Soo [ni]et so[w]d ick moetten nemen Passgensy voor dese tyt Nochtans sal ick niet verureemen Van u lieff al so subyt Maer ick wil leuen Op hoop dat ghy sult gheven Eens troost voor dit verdriet O lieff verheuen Soo sal ick u aen cleven En oock verlaten niet
Prinsesse sal ick moeten scheyden Van u al in dese tyt Ick had liever u wat lang te beyden Dan van u te syn ontseyt Eer ick wou deruen Dat een ander sou erven Al tot zynen geval Och voor ick sterue Hoop ick u te verwerven Hier in het aersche dal
hopende sorch ick [O P G] | |
|
Album amicorum van Aefgen Claesdochter van Giblant
|
1598-1600
|
Den Haag KB: 135 K 36 |
f31v |
|
Willem Kuiper, naar bron, diplomatisch. |
|
© 2024 KNAW/Meertens Instituut