|
|
Op die wyse als begint
Gaet wt wilt vreucht aenuaerden Aurora compt op hant Phebus spant syne paerden In syn waegen playsant De blomkens te bestieren Met vreuchden menichfoult Ceres toont haer manieren Des meys vyrtuyt anschout
Eolus is v gonstich Hy aquilo bedwingt Want die is seer afgonstich Flora die nu voortbringt Blomkens van al coleuren Men vintse schoon bedout Elck gebruyckt sy [nateuren] Des meys vyrtuyt anschout
Ghy amoreuse geesten Behaelt nu prys en loff Compt al tot deser feesten Buyten in Cupydos hoff Want men aldaer sal schieten Pylen van loot en goudt Dus laet v niet verdrieten Des meys virtuyt aenschout
Haest v om daer te comen V lieff aldaer verwacht Wilt geen perykel schromen Diana is op die wacht Gaet met v lieff spanceren Buyten in het groene wout Wilt met haer accorderen Des meys virtuyt aenschout
Men sal vreucht orboren Prince merckt smeys virtuyt Nimphen sult ghy daer horen Accoort van soet geluyt Wonder is daer geschepen T gauts blomken daer aenschout Al wt jonste begrepen Des meys virtuyt aenschout
Dat myn lieff my sondt een van haer booden off ick t'auont by haer wilde comen teeten en dat Juno my selfs te gast quam noden by al die goddinnen in den hemel geseten ick soude segghen ontschuldicht myn vermeten ick blyff by de goddin bouen al van waerden die hier beneden by my woont op der aerden | |
|
Album amicorum van Aefgen Claesdochter van Giblant
|
1598-1600
|
Den Haag KB: 135 K 36 |
f37r |
|
Willem Kuiper, naar bron, diplomatisch. |
|
© 2024 KNAW/Meertens Instituut