Dutch Song Database

Op die wyse van Almangie de loedt In mynen sin heb ick vercoren saen Een excelent / seer jent bekent Blomken seer wel gedaen Op v goddin so gryp ick moet voertaen Als ick my went / present / ontrent V schoon vrouwelyck graen Om v so moet ick my verblyden Oeck so doet ghy my vele lyden Ghy verheucht myn hert Oock doet ghy my groote smert Om haer / maeck ick vreuchde voorwaer Want voor en naer / eenpaer / seer claer Syt ghy die liefste caer Seer swaer / oock met veel druckx gebaer Treurt met veruaer / voorwaer / al t iaer V getrouwe dienaer Aen dit schoon beelt heb ick geuonden rust Dat druck verjaecht / en laecht behaecht Oock al myns herten lust Ghy die my stelt het herte met onrust T welck droeuich waecht / versaecht / en claecht Dattet niet wert geblust Gelyck Veenus Paris beloofde Helena die hy wt griecken roofde Hoop ick dat dit juweel Sal syn myn beste deel Seer reyn / myn alderliefste greyn Ghy syt certeyn / int pleyn / alleyn Die schoonste rosemareyn Geweyn / en met suchten gemeyn Heb ick doleyn / onreyn / niet cleyn Geleden als villayn V wesen fier v amoreux gesicht V net persoon idoon seer schoon Heeft myn jonckhert verlicht Door tsoet bestier der liefden brandt gewicht Spant sonder hoon die croon ten toon Ghy schone venus nicht Schoonder noyt myn oghen aensaeghen Dan die my na haer doet jaegen Want v schoon aenschyn Blinck als aurora fyn Valyant goddinne tryumphant Ghy hebt geplant een brant playsant In myn o dyamant T'verstant my oeck vermindert want Heel ruynant ter schant int sant Daer om reyckt my v hant Syt my getrou princesse soet Want tcleyn gewin daer in v sin Bedroeuen myn gemoet Suyuer kersou schone matresse goet Stelt toch v sin en min van bin Nen myn juechelyck bloet O godt hadt gy tgenoecht bequaeme Dat wy als bykens sworuen tsaemen So waer myn pyn een endt Daer ick om lyde torment Verhoort o liefste met accoort Die leyt versmoort bekoort vermoort In liefde rechteuoort T' ja woort geeft hem toch van nu voort Want hy orboort t behoort antwoort T' ontfanghen met confoort finus Album amicorum van Aefgen Claesdochter van Giblant 1598-1600 Den Haag KB: 135 K 36 f38v Willem Kuiper, naar bron, diplomatisch.

© 2024 KNAW/Meertens Instituut