|
|
Op de wyse noble francoys
Als ick eerst was gecomen By v lieff excellent In een hoff fray met bomen Geplant seer partenent Ick dacht in mynen sinnen Al op dat selue pas Dat het waert te beminnen Alsulck een jonckman was
Doch ons kennis vermeerde Door v begeerte fris En ick niet apsenteerde De myne was tgewis V sin ghy my verclaerde Tonende lieffde reyn En spraeckt als donbeswaerde Ghy syt myn lieff alleyn
Als vlyses behendich Hebt ghy my seer oprecht O lieffde die inwendich In t'hert was wtgeleyt En spraeckt in myn presenty V liefft heeft my doorwont Mocht ick tot myn intency Comen t'eniger stont
Moedich was v begeeren Den sin toch wel verstaet Wy souden gaen spanceren Daermen gemeenlyck gaet Wy ghingen oock seer lustich Maer gecomen ter ste[e] Waert ghy al wat onrustich T'welck my oock seer vreemt dee
[Buyten] meningh vermaende Ghy had gesproken dat My selfs ick deed verstaende Denckende wat schaet dat Ick daer mede betoonde Myn lieffde tvwerts siet Die in myn hert doen woonde Toch ick t'niet blycken liet
Voortaen ginckt ghy oock stellen Tot my v lieffde gaet Die ick al sonder quellen Aennam al metter spoet Dat my tot v deed keeren Was v fray weesen fyn En v soet [diny]seren Verwan dat herte myn
Roerende was tonureden V gemoet so het scheen Om dat v en myn reden Niet quaemen ouer een Maer ghy most sonder toeuen Vertrecken seer versaecht Dus ginck ick my bedroeuen Want theeft my niet behaecht
Treurich den tyt genaeckte Ghy aen my orloff naemt En v op reyse maeckte Maer wederom ghy quaemt V noch eens presenteren En spraeckt met goet bescheyt Ick bid v lieff vol eeren Myn wedercomst verbeyt
Staedich ghy my waert biende V princelyck persoon Toch ick my sulckx ontsiende En sprack met soeten toon So Godt ons wilde paeren Het sal geschien seer soet Al gae ick niet beswaeren Myn trou en myn gemoet
Finis | |
|
Album amicorum van Aefgen Claesdochter van Giblant
|
1598-1600
|
Den Haag KB: 135 K 36 |
f53v |
|
Willem Kuiper, naar bron, diplomatisch. |
|
© 2024 KNAW/Meertens Instituut