Home     Grasduinen     Over     Zoektips     FAQs     Disclaimer     Meertens Instituut         english

Nederlandse Liederenbank


Een nieuwjaer liedeken op de wyse van
Laest ginck ick inde mey etc

Reyn maecht ick moet v saluteren
Deesen groet v schenckende
Waer door myn vruecht noch sal vermeren
Die andren syn krenckende
Ick en acht geen clappers siet
Die dit moogen lyden niet
Trouw en goet / es tgemoet / twelck [-moet]<+sal> singhen
Vuwen loff reyn maecht eerbaer
Twesen soet / in my doet / vreucht ontspringhen
In dit gulde nieuwe jaer

Godt geeff dat dit lieff moet beginnen
Met spoet / blyschap / en vroolycheyt
Met meer voorspoet altoos voortrinnen
E]nde vuytgaen in salicheyt
Dat ghy lieff in trouwe goet
Muecht vergaren metter spoet
Onbenyt / seer verblyt / gaen spanceren
Met v alderliefste caer
Tallen tyt / sonder stryt / domineren
In dit gulde nieuwe jaer

Och Muse wilt my nu voorts dichten
Deses maechdens loouen groot
Compt voort Apollo wilt niet swichten
Helpt my vint desen noot
Icarus jonck was wel seer stout
Als hy syn vleugels heeft betrout
Door tbestaen / streeck de vaen / bouen crachten
Is in zee verdroncken claer
Sulcxs ick waen / dat ter baen / my sal wachten
In dit gulde nieuwe jaer

Trou es een vreempt gast
Die trou mint trou ontlast

Anno 1600 D



Nochtans door hulp der goddinnen
Vaer ick met myn reden voort
Vlisses spraeck & Venus minnen
Werden in dees maecht gespoort
Van leden fray gestatueert
Twesen diuin gedistingueert
Geen corael / hoe loyael / soo mach blincken
Int yuoor gestelt voorwaer
Gy myn quael / teenemael / kan verdrincken
In dit gulde nieuwe jaer

Haer deucht / haer [liff] en haer manieren
Geene tong vuytspreecken sal
Haer sang haer gang die haer vercieren
Gaen tverstant te bouen all
Mocht ick van dees reyn maecht vreedsaem
Eenich cleyn troostlyck woort ontfaen
Alt verwyt / en gecryt / hier [beneuen]
My verlaten sal eenpaer
Seer verblyt taller tyt soud ick leuen
In dit gulde nieuwe jaer

Prince.
Oorloff hiermet Princes diuine
Neempt in danck dit cleyn gedicht
Geeft graty maeckt doch geen [ruine]
Ghy staet alleen int hert gesticht
Ick hoop met v verheucht te syn
Tscheyden van v dat valt myn pyn
Ghy alleen [syt] zeer reen die goddinne
Die wechneempt myn lyden swaer
Anders geen ick certeen sal beminnen
In dit gulde nieuwe jaer

Finis

Album amicorum van Aefgen Claesdochter van Giblant
1598-1600
Den Haag KB: 135 K 36
f83r

Willem Kuiper, naar bron, diplomatisch.