Nederlandse Liederenbank


Een Amoureus Liedeken Op de wyse van Denghelsche Fortuyn Lieffde int secreet Myn jonck hert krencken doet Sonder s'lieffs weet Ick veel oock dencken moet Hoe ick my schicke My compt te vooren staech Lieffde die ick Tot d'uytvercooren draech Haer oochskens claer My somptyts schencken goet Een seer eerbaer Loncxkens [en wencxkens] zoet Dwelck myn hert Int alderdiepste prickt E]n met smart Ontroert en verschrickt Een swaer [ghesuchte] Vuyt t'shertsen diepen grondt Volcht seer beducht Daer naer treurich terstondt Alsmen v naem In myn presentie noempt Loopt t'bloet tesamen Een andere veruwe compt Nyemandt en weet Nochtans wat my [l]edt Want int secreet Is de lieffde gesedt Ick hebbe mynen noot Noch nyet geclaechte Den medecyn meester Noch om geen hulp gevraecht Maer ick bemin V bouen goudt alleen Dan lachen och V hert is nyet wel te vreen Dat het nyet en mach Door den mondt spreken luydt Syn swaer geclach En gebreken vuyt Dies neem ick waer Bequamer vre en stonde Om eens te gaer Te spreken mondt aen mondt Als och en ooch Malcanderen co[mm]en by En thertte poocht D]atter oock naerder zy Compt duyffkens hier Die Venus coetse treckt Nempt dit pampier En brenght [thet] [wel] per[tf]eckt De jonckvrouwe so ane Die zoo veel deuchden heeft Als een persoon Die op der eerden leeft Want zy is myn Matresse en ick wil haer Eeuwelyck zyn Een oprecht getrouw dienaer Naer mynen sin Is zy tschoonste juweel Dat ick benin Onder duysend veel

Album amicorum van Aefgen Claesdochter van Giblant
1598-1600
Den Haag KB: 135 K 36
f102r

Willem Kuiper, naar bron, diplomatisch.