|
|
Een nieu Liedeken op die wijse. Ick had een ghestandich minneken.
Den dertiensten van Meerte Sconincx volck vertrocken is Treckende in ordonnantie met stercte Des Conincx volck was dat ghewis Om te comen in dat ghehuchten Van Oustruweele vol ghenuchten Het syn wel vreemde cluchten En dat u nu ten deel gheuallen is.
Doen de clocke achte was Quamen daer al op dat pas Dese eedele Capiteynen Mijn Heere van Beauuois En Mandeuille sterck en boys En de la Motte oock om vercloecken De Geusen quamen sy besoeken Toulouze gheuende goeden dach.
Den Capiteyn Toulouze Die seer verwondert was Doen hy hem vant bespronghen Docht wel dat hy verraden was En sprack al op dat pas O Godt weest mijn behulpich Om de waerheyt lijdet ick verduldich Och en gaet my toch niet af.
Beauuois hief op een stemme En sprack sijnen knechten aen Wel aen vrome soldaten Laet ons inden hoop nu staen Want wy hebben den Coninck eedt gedaen En oock die Catholijcxse kercke Laet nu de Geusen mercken Dat wy voor mannen staen.
Daer schooten sy dapperlijcken Al in Toulousens hoop Toulouze moste wijcken Met eenen scheut bleef hy daer doot Daerchiers speelden oock al met den cloot Sy schooten en sy branden Sy deden wonder met haer handen Die Geusen hielen den quaetsten coop.
Mijn heere Capiteyne Brecht Die en was daerooc niet slecht Hy dede die bruggen breeken Also alst hem scheen recht Dit vernamen sommighe Geusen sijn Om hun hier van te vreeken Int haernas hebben sy hun ghesteeken Ende wilden de Geusen van buyten by staen
Den eedelen Prince van Orangien Ootmoedelijck heeft hun ghebeen Och goede vrome mannen vol couragien Weest gherust en wel te vreen Ouer tvelt is Sconincx volck ghesaeyt En sy sijn al op de beenen nu Dus wilt u toch vercleenen nu Oft ghy compt alle ter schanden nu
Doen hebben sy hun vergadert Op de Meere met alle hun macht Het gheschut wt den Eechoue Hebben sy ghehaelt met cracht En hebben dan den vrydaech snachs Die gheuangenen wt ghelaten Minnebroeders gheleydt lancx der straten Wt de Cloosters ghehaelt wat hulpt u dat.
Doen den saterdach was aencomende Hebben sy behaelt groot schand Verlaten moesten sy de Meere De Papisten creghen douerhand Dwelck was seer de Martniste tant Maer zijde en hebben sijer niet by gesponnen Sy sijn al tsamen ouerwonnen Viue le Roy behauwet landt.
Prince. Dus kinderkens en wilt niet speelen Teghens u Meesters alsulcke spel Want ghy soudet bequeelen Sy cunnent caytsen al te wel So en wilt niet sijn rebel En wiltse oock obedieren Die u wel gouuerneren So en comdy in gheen ghequel.
| |
|
Een nieu liedeken op de wijse. Ick had een ghestadich minneken
|
[1567]
|
Gent UB: Acc. 6775 |
plano |
|
Transcriptie naar bron, diplomatisch. Door Alexandra Kecskés. |
|
© 2024 KNAW/Meertens Instituut