|
|
Een nieu Liedeken, Op de wijse, Het daghet uyt den Oosten. Och God wilt doch vertroosten De benaude ghemeynte seer, Gheen hulp van Suyt noch Oosten, Dan alleene van God den Heer.
Antechrist met sijn ghesellen Rasen en woeden heel verwoet, Gods uytvercorne, sy quellen En storten t'onschuldich bloet.
Ghelijckmen mach aenschouwen Aenden nieuwen Commandeur, Diet Landt brenght int benouwen Sijn Rijck heeft niet langher gheduert.
De Zee heeft hy verlooren Met haer steden groot van macht, Sijn schepen gheen victory orbooren Teghen der Vlissinghers cracht.
Een aenslach dede hy maken Opt Eylant van Schouwen fijn Om een hoecxken in de Zee te raken Maer ten sal niet wel ghewonnen zijn.
Ten eersten heeft hy in ghenomen Brouwershaven de schansse groot Daer nae heeft hy sonder schromen, Beleghert Bommene minjoot.
Binnen Bommene drie vaendels laghen Al van des Princen heyrcracht, Diet niet met wille opgaven Maer wederstonden met macht.
De Spangiaerts laghen daer langhe veur, Om dat sijt niet conden winnen voort Sy stormden een gheheel dach deur Daer gheschiede soo grooten moort.
Met ghewelt zy invielen Bommene de schansse groot Sy moorden daer alsoo vele Men sach noyt meerder noot.
Die Spangiaerts raesden soo seere Om haerder soldaten verlies, Daerom spaerden sy niemant weere Maer jaechden de Geus door de spies.
Prince wilt een exempel nemen Aen dese soldaten goet, Die daer lieten haer leven, Voor t'Vaderlant ghestort haer bloet. Staet naet beste, fecit. | |
|
Een Nieu Geuse Lieden boecxken/ Waer inne begrepen is den gantschen Handel der Nederlantscher geschiedennis/ [sic] dees voorleden thien Jaren tot noch toe toeghedragen/ eensdeels onderwijlen in Druck wtgegaen/ eensdeels nu nieu byghevoecht. Midtsgaders sommighe schoone Refereynen/ ten seluen Propooste dienende/ hier achterbyghestelt. Nu nieuwelick vermeerdert/ ende ghecorrigeert. Pro Lege, Rege, & Grege. [houtsnede 'Viue le Gues'] Viue Dieu, La Santé du Roy, & la Prosperitè [sic] des Geus.
|
[1578?]
|
Parijs Bibliothèque Nationale: Rés. p. Yi 24 |
f91r |
|
DBNL, naar Kuiper & Leendertz 1924. |
|