|
|
De Spangiaerden haer moetwille bedrijvende, met Moorden, rooven, ende Vrouwen-schendinghe, zijn die Staten veroorsaect de wapenen aen te nemen, om de Spangiaerden uyt den lande te verdrijven: een nieu liet op de wijse, alsoot begint. Wel op, wel op Spangiaerden, Die nu in Brabant zijn, Hoe smaken u die ghebraden Daer toe den coelen wijn, Ghy moet naer Spangien met ghewelt, Sonder Paspoort, sonder gelt, Jochey, nu slaet dien Spangiaerts vry.
In Brabant quamen sy dringhen Die Spaensche Jonckers wijs, Vlaendren wouden sy dwinghen, Die steden maecken prijs Of sy wolden hebben betaelt, Die leste penninck ongefaelt Jochey nu slaet de Spangiaerts vry.
De Staten van den Lande, Die setten haer een dach, Wy sullen u wel betalen U Leeninghe corten af Soo moest ghy uyt den Lande gaen Die Spangiaerts riepen niet te verstaen Jochey, nu slaet de Spangiaerts vry.
Die Spangiaerts altemale, Riepen cleyn ende groot, Ghy sullet ons al doen betalen, Die daer zijn ghebleven doot, Of wy brenghen die stede al onder de voet Wasschen ons handen in Borghers bloet Jochey nu slaet de Spangiaerts vry.
Die Spangiaerts worden Heeren Als sy quamen in Brabant, Dat Landt wolden sy regeeren Sy waren daer onbekant, Dat Lant was haer gegeven van den Duckdalf Maer sy en creghent noch niet half Jochey nu slaet de Spangiaerts vry.
De Spangiaerts vals van gronde Die hadden een raet bedacht, Hoe sy wolden vermoorden Om brenghen op eenen nacht, Brussel, Mechel, Lueven saen, Als sy tot Antwerpen hebben ghedaen, Jochey nu slaet de Spangiaerts vry.
De Staten van de Landen, Die lieten die Tromme omslaen, Om Ruyters ende Lantsknechten Die wollen sy nemen aen, Die kinders roepen in Brabant op de straet, Des morghens vroech, des avonts laet, Jochey nu slaet de Spangiaerts vry.
Ghy Duytschen ende Walen Die inde Nederlanden stolt, Wy sullen u wel betalen Met silver ende root golt Wy sullen de spaensche Heeren altemael Ridder slaen met yser end stael, Jochey nu slaet de Spangiaerts vry.
Als die Spangiaerts zijn verdreven Met hare spaensche knap, Die moeten leeren weven Oft roepen kettellap, Of schoorsteenveghers sonder Leer Is dat niet schant van sulcken Heer, Jochey nu slaet de Spangiaerts vry.
Ghy Spangiaerts moet nu duycken, Wat baet u moorden fel, Dat ghy ons Coninckx Landen, Soo seer maeckte rebel, Den Coninck van Spangien is onsen Heer Die roept, slaet doot de Spangiaerts seer, Jochey nu slaet de Spangiaerts vry. | |
|
Een Nieu Geuse Lieden boecxken/ Waer inne begrepen is den gantschen Handel der Nederlantscher geschiedennis/ [sic] dees voorleden thien Jaren tot noch toe toeghedragen/ eensdeels onderwijlen in Druck wtgegaen/ eensdeels nu nieu byghevoecht. Midtsgaders sommighe schoone Refereynen/ ten seluen Propooste dienende/ hier achterbyghestelt. Nu nieuwelick vermeerdert/ ende ghecorrigeert. Pro Lege, Rege, & Grege. [houtsnede 'Viue le Gues'] Viue Dieu, La Santé du Roy, & la Prosperitè [sic] des Geus.
|
[1578?]
|
Parijs Bibliothèque Nationale: Rés. p. Yi 24 |
f96v |
|
DBNL, naar Kuiper & Leendertz 1924. |
|