Nederlandse Liederenbank


Een nieu Liedeken van het ontsett van Steenwijck, ende van S. Jans Camp, Men macht singhen op de wijse: Ick ginck een mael spanseren. Verheucht u boven maten Ghy mannen ende vrouw:, Godt sal u niet verlaten Al die op hem betrouwt, Als onsen Hemelschen Vaer, Wy hebben hem aengebeden Om zijn ghenade mede Ons te verlossen alle gaer. Ons ghebedt die wy beden Dat heeft nu Godt verhoort, Sulcke cleyne steden Soo die worden vermoort, Van die Tyrannen wreet Als sy te Haerlem deden, Te Zutphen binnen der stede, Ende oock tot Naerden meed. Als Leeuwen ende Draken, Laghen sy voor de stadt, Om die arme schapen Die binnen Steenwijck satt, Te vermoorden cleyn en groot Die daer binnen waren, Maer Godt die ginck haer sparen Die betrouden op Gods woort. Het ontset was voorhanden Van die Prins excelent, Om die Nederlanden Te maken fraey ende jent, Nu is Steenwijck verlost, Nu moghen wy passeren Met vreuchden domineren, Haest op sy spelen most. Aenhoort doch sonder falen, Ons volck quam met ghewelt, Ick sal het u verhalen, Hoe sy waren ghestelt, Teghen haer vianden fel, Dat hebben sy vernomen Dat die Geusen zijn ghecomen Met die Enghelsche Cornel. Dat wil ick laten varen, Mijn hert was noyt so bly, Om darme luyden die daer waren Dat sy nu sinnen vry. Lovet Godt uut herten grondt, Den Heer wil die Prins bewaren, Met zijn Soldaten alle garen, Die Steenwijc trouwelick by stont. Een Ridder hooch gheboren Die Heer van Nieuwen oort Met zijn Soldaten uutghecoren So was by ghecomen voort, Al nae S. Johannis Camp, Die Enghelsche Soldaten, Ensom die quam heur te baten En verlostense uut Pharos handt. Van daer zijn sy ghescheyden Met een so oevelen moet, Godt die wil ons gheleyden Nae Steenwijck metter spoet, Dat bidden wy u, O Heer, En wilt ons helpen strijden, Om die arme luyden Te helpen uut dat lijden seer. Als sy voor Steenwijck quamen Die van binnen dat vernam, Haer Vendelijn sy vlieghen saghen, So lustelick dat hijt swam, Ghy Borghers alle gaer, Soldaten ende vrouwen Laet ons op Godt betrouwen, Hy can ons helpen uutlijden swaer. Waeromme so willen wy trueren Het ontset is voor die handt, Die Prins van Orangien tallen uren, Die doet ons onderstant, Als teghen onsen vyandt, Om die stadt te ontsetten, Haer Ruyters doen dat letten: Sy sinnen so wel ghemant. Was dit niet Gods mirakel? Al door een mans persoon, Een schans die gingen sy maecken, Die stadt ontset te doen, Sy liepen al een wech, Daer quamen drie hondert peerden Van die Maelcontenten ghereden, Nu hoort wat ick u segh. Een Engels Soldaet van binnen Hy stont al op de schans, Hy riep met helder stemme, En seyde Duytsman coemt aen, Keel of riep Hans mof, Met roepen ende beeren, So ginck hy haer verveeren Dat sy niet comen dorst. Al waren sy sterck van peerden Haest op, was daer die leus, Steenwijck die cleyne stede Voorwaer die blijft nu Geus. O Georgen van Laleyn Hoe hebbet ghy ons voorghelogen? Ghy hebt u hooch verboghen De stadt te crijghen in. Hans Mof die most nu draven En hy most ruymen met schandt, Wat zijn wy arme slaven Hier binnen vreemde landt? Och rijcke Heere Godt Gheen betalinghe hebben wy ghecreghen En so langhe hier gheleghen, Wy moeten ruymen noch. Wat sy binnen Steenwijck deden Van blijtschap hoort mijn vermaen: Die brooden op spietsen mede Sijn sy die wal langhes ghegaen, Die Malecontenten te spijt, So binnen sy gheganghen Ter thooren uut ghehanghen Die brooden aen alle zijt. Hoe hevet huer dat ghespeeten En die Heer al van Laleyn, Langhe neusen sonder eeten Creghen sy alle ghemeyn, Och waerlich liever Hans Wat wiltmer langher macchen? Wy crijghen magher kacchen, Sy hebben kost und dranck. In Februario lestleden Den dryeentwintichsten dach Doe wert Steenwijck de stede Verlost alsomen wel sach, Hans Mof trock op die loop Uut haer schanssen met hoopen Haer Ruyters daer of stoten Haest op was goede coop. O Groeninghen ghy meucht welbeven En laten u vrienden in, Ghy en wilt haer niet begheven Ghy zijt tot haer ghesint: Hebt ghy nu wel ghedaen Ghy meende het waer nu al ghewonnen Tvlas is gherockent niet ghesponnen: Die Geus wil u comen aen.

Een nieu Geusen Lieden Boecxken Waerinne begrepen is, den gantschen Handel der Nederlantscher gheschiede-nissen, dees voorleden Jaeren tot noch toe ghedragen, eensdeels onder wylen in Druck uutghegaen, eensdeels nu nieu byghevoecht. Nu nieulick vermeerdert ende verbetert. Vive Dieu, La Santé du Roy, & la Prospérité des Geus
1581
Den Haag KB: 1714 E 20
f98r

DBNL, naar Kuiper & Leendertz 1924.