|
|
Een nieu Liedeken op de doot ende begraeffenisse van zijne Excellentie, Hoochlooflicker Memorien. Nae de wijse, Era de Majo. Nero moordadich Sijt ghy noch int leven? Judas verradich Wat hebt ghy nu bedreven? NASSOV tEdele bloet Hebt ghy doen sneven, Die ons de Heere goet Hadde ghegheven.
PRINS fier van moede, U Ghemeente u beclaghen, Edel van bloede, Tsal u vyandt ghewaghen, Dat ghy door moorders daet Nu zijt verslaghen. O boosen Spaenschen Raedt. Het zijn u laghen.
Tjaer vier-en-tachtich, Den Thienden July eylacy, Vermoort waerachtich, Die Heer die geef ons gracy. Te Delff binnen der stee Met grooter stacy, Begroefmen hem met vree Van alle Nacy.
Goe accordanci: Naer Edelheyts hanteren, Met ordonnanci Sachmen Schutters passeren: De Dienaers quamen daer na Van al de Heeren, Men sach vroech ende spae Seer Lamenteren.
Lackaeyen, Pagien, Officieren by namen, Met droeve coragie, Volchden alle te samen, D'Edele van zijn huys Oock daer na quamen, Den Raedt sonder ghedruys Sachmen versamen.
Trompetters weemoedich: En daer na om sien deerlijck Sachmen seer goedich Een Paert bereyt, seer eerlijck: Gheleedt van Schoten wijdt Daer toe begheerlijck, Het Wapen droecht subijt Van BREDA heerlijck.
Die eerste Baniere Van Breda vol vromen, Met goede maniere Is doen daer voorts ghecomen, Den Heer van Dircxlandt Heeftmen vernomen Met t'Standaert in zijn handt Al sonder romen.
Sonder cesseren Een Paert ghedeckt alsvoren Al vander VEERE Droecht het Wapen vercoren, Roulles en Delfft vry Soo ghy meucht hooren, Leydtsluyden waren sy Al sonder thoren.
Met droeven sinnen Die Baniere seer crachtich Sachmen in minnen Dragende welbedachtich Van Egmont de Heer Met sinnen sachtich: O Burghers vander Veer Sijt nu toch clachtich.
Van CHALON t'Wapen Heeft t'ander Paert ghedraghen, Men sacht verknapen Doestrum en Sprangen verslagen: T'Banier van Chalon fier Jent int behaghen Boetslaer met soet bestier Diemen daer saghen.
Ter selver stonden Soo quam daer voorts gereden Seer jent ghebonden: Na die voorgaende zeden t'Wapen van DIEST rosier, En diet Paert leede Was Rosue goedertier Floris Serclais mede.
Jasper ghepresen Van Poelgheest seer onblijde Droevich van wesen De Banier seer onblijde Droech hy tot s'Princen eer Ten selven tijde. Terstont sachmen daer weer Aen comen rijden,
Tpaert dat vermelden Het Wapen van VYANDEN, Twee vrome Helden Die waren daer by handen Raephorst, Almonde goet Uut onse Landen Leyden het Paert seer soet, Tot svyandts schanden.
Tot Lofs vermeeren Van Hollant hooch van waerden Ghinck presenteren Die Banier reyn van aerden Gerrit al vander A Den onvervaerden. Doen sachmen stracx daer na Noch dese Paerden.
CATZENELLENBOGHE De Wapenen seer Edelick Niet om verhooghe Die droech het Paert seer zedelick, Linden ende Wijngaert Mannen seer redelick Leytsluyden van goeder aert Waren sy vreedelick.
Men ghinck verthoonen Terstont na dese dinghen Niet om verschoonen De Banier sonderlinghen Heer Lancelot seer cloeck Sachmense bringhen. Daer na met goet versoeck Sachmen voortdringhen,
Van NASSOUWE (U Edel generacy O PRINS ghetrouwe) Quam daer als doen ter stacy, Tpaert leyden excellent Utenhorst met gracy Philips vander A seer jent Met lamentacy.
T'PRINSCHAP D'ORANGE Seer heerlick voor ooghen, Tot spijt van Spangen, Sachmen daer me vertoghen Duvenvoorde en Bacx Al sonder loghen, Noch sachmen daer stracx Nae eere poghen,
Twas de de Marquette. LE GUYDON sachmen dreghen Niet om vernetten Van Mansert reyn int pleghen: Rijhoven de STANDAERT Soo was te deghen: Naeltwijck droech goedt van aert TPENON met seghen.
T'SWAERT inder scheede Vander Wacht Capiteyne Duytz droecht met vreede Voor Heeren groot en cleyne: Den WAPENROCK seer Eel Bredenroede reyne: Droeflick quam T'Paert Eylaes alleyne.
De vier QUARTIEREN Veel Edelluy van crachte: T'Scilt sachmen regieren, Met den HELLEM van machte, Jacques van Egmont Die hier op achte Droech den Helm, tOorloochs Verbondt Merwe op wachte.
Het PAERT van DROEFFEN'S Waer af die leytsluyden Maldereede als Heere fris En Brecht diemen rieden. Terstont daer na seer reyn Sachmen gheschieden t'SWAERT bloot droech Oversteyn van AL t'GEBIEDEN.
Net en ydoone Die Hofmeesters seer waerdich Creauge de CROONE: De Helbaerdiers seer aerdich Beneven t'LYCK seer schoon Ginghen sy vaerdich: De Heer die sy haer loon Haers dienst expaerdich
Twaelf Edelluyden Des Huysen van Nassouwe Niet sonder vermijden, Barnold, Aernhem vol rouwe, Harngael, Schoonhoven jent, Heere de Bouwen, Extri, Rijhoven int ent, Die Bye ghetrouwe.
Noch in presenci Den HERAUT na t'betamen Van zijn Excellenci Droech t'WAPENROCK eersame, Die Commissaris Rossel Was synen name. Daer na sonder ghequel Dees Heeren quamen:
De Graeff Maurici, Twee Heeren hem geleyden Een Forst sonder malici Van Ceulen hem verbeyden, Van Hohenlo de Graeff Niet af en scheyden, Die Heere gheeft zijn gaeff Onder haer beyden.
Noch ander veel Graven, Heeren, en daer toe Knechten, Die Staten sachmen draven Om dat wel te beslechten: Die Heer gheeft haer ghena Dat sijt uutrechten, Dat sy helpen vroech en spa Ons Arme slechten.
PRINCE. PRINCE ALMACHTICH Heer soudt ghy ons nu gheven Een, die ons crachtich Soude brenghen in sneven? Ick hoop een beter siet, O Heer verheven, En straft na verdiensten niet Hier in dit leven. | |
|
Een nieu Geusen Lieden-Boecxken waerinne begrepen is den gantschen Handel der Nederlandtscher geschiedenissen, dees voorleden Jaeren tot noch toe geschiedt eensdeels onderwijlen in Druck uutghegaen, eendeels nu nieu byghevoecht. Nu nieulick vermeerdert ende verbetert. Vive Dieu, La Santé du Roy, & la Prospérité des Geus
|
1588
|
Den Haag KB: 1712 G 4 |
f76v |
|
DBNL, naar Kuiper & Leendertz 1924. |
|